Leave a comment

የጠቅላይ ሚኒስትሩ የቦንጋ ጉብኝት ቅኝት


እሑድ መስከረም 4 ቀን 2012 ዓ.ም. ጠቅላይ ሚኒስትር ዓብይ አህመድ (ዶ/ር) ከምክትል ጠቅላይ ሚኒስትር አቶ ደመቀ መኮንን፣ ከመከላከያ ሚኒስትር አቶ ለማ መገርሳ፣ ከደቡብ ክልል ምክትል ርዕሰ መስተዳድር አቶ ርስቱ ይርዳውና ከቀዳማዊት እመቤት ወ/ሮ ዝናሽ ታያቸው ጋር በመሆን ከ50 በላይ ጋዜጠኞችን አስከትለው በደቡብ ክልል የክልልነት ጥያቄ ከሚነሳባቸው አንዱ በሆነው የካፋ ዞን ተገኝተዋል፡፡ ጠቅላይ ሚኒስትሩ በዞኑ ዋና ከተማ ቦንጋ ሲደርሱ፣ ከንጋቱ 12 ሰዓት ጀምሮ በከተማው መለስተኛ ስታዲየም ታድመው ሲጠብቋቸው በነበሩ የቦንጋና አካባቢው ነዋሪዎች ደማቅ አቀባበል ተደርጎላቸዋል፡፡

ጠቅላይ ሚኒስትሩ በስታዲየሙ ተሰብስበው ሲጠብቃቸው ለነበረው የአካባቢው ኅብረተሰብ ንግግር ከማድረጋቸው በፊት፣ የእንኳን ደህና መጡ መልዕክት ያስተላለፉት የዞኑ ዋና አስተዳዳሪ አቶ ማስረሻ በላቸው ናቸው፡፡ ጠቅላይ ሚኒስትሩን ለመደገፍ ከዓመት በፊት ሠልፍ በተደረገበት ሥፍራ ተገኝተው ሕዝቡን ማግኘት በመቻላቸው ትልቅ ደስታ እንደፈጠረባቸው በመግለጽ፣ ጠቅላይ ሚኒስትሩ ባስተዋወቁት ‹‹የመደመር ፍልስፍና›› በመመራት አስተምህሮቱን ዕውን ለማድረግ፣ አገራዊ ኃላፊነቱንና አደራውን ለመወጣት በመትጋት ላይ የሚገኝ ሕዝብ እንደሆነም ጠቁመዋል፡፡

አቶ ማስረሻ የካፋ ዞን እየተመናመነ ከለው የአገሪቱ የደን ሽፋን ከ700 ሺሕ ሔክታር በላይ ጥብቅ ደን በመያዝና በኢትዮጵያ ለመጀመርያ ጊዜ በዩኔስኮ በመመዝገብ የአገሪቱ ሳንባ ሆኖ የዘለቀ ሥፍራ መሆኑን በመጠቆም፣ ዞኑ ካለው አቅም የተነሳ ለአገሪቱ የውጭ ምንዛሪ በማስገኘትና አዳዲስ ኢንቨስትመንቶችን በመሳብ ሊጠቅም የሚችልና ትልቅ አቅም ያለው ነው ብለዋል፡፡ በተጨማሪም በለውጡ ማግሥት በተለያዩ አካባቢዎች ችግሮች ሲከሰቱ በውዥንብሮች ሳይፈታ ራሱን ጠብቆ የቆየ አካባቢም እንደሆነ ተናግረዋል፡፡

ከአንድ ሺሕ ዓመት ቀደም ብሎ እስከ 19ኛው ክፍለ ዘመን መጨረሻ ድረስ በምንጃ፣ ማቶና ሚንጃ ሥርወ መንግሥታት እየተመራ የቆየ ሕዝብ እንደሆነ የገለጹት አቶ ማስረሻ፣ ካፋ ወደ ማዕከላዊ መንግሥት ከተቀላቀለ በኋላም ፍፁም ኢትዮጵያዊነቱን ጠብቆ የኖረና እየኖረ ያለ ሕዝብ ነው ብለዋል፡፡

ሆኖም ምንም እንኳ በተለያዩ የብዝኃ ሕይወትና ሌሎች ሀብቶች የታደለ አካባቢ ቢሆንም በአስፈጻሚ አካላት ትኩረት ማጣት የተነሳ ለበርካታ ማኅበራዊና ኢኮኖሚያዊ ችግሮች የተጋለጠ ነው በማለት ዞኑ መንገድ፣ ውኃና ሌሎች መሠረታዊ የሆኑ የመሠረተ ልማቶች ችግር በስፋት የሚስተዋሉበት ነው ብለዋል፡፡

ለአካባቢው የተሻለ ጥቅም ሊያመጡ ይችሉ የነበሩና ባለው አቅም የተነሳ የአግሮ ፕሮሰሲንግ ማዕከል ሊያደርጉት ይችሉ የነበሩ የኢንዱስትሪ ፓርክ ፕሮጀክቶች እንኳን እንደተነፈጉት የጠቆሙት አቶ ማስረሻ፣ የጠቅላይ ሚኒስትሩ ጉብኝት ሲንከባለሉ የመጡ የኅብረተሰቡን የልማት ጥያቄዎች ለመፍታት እንደሚያስችል ትልቅ ተስፋ መጣላቸውን አስታውቀዋል፡፡

በክልሉ ምክትል ርዕሰ መስተዳድር አቶ ርስቱ ይርዳው ተጋብዘው ንግግር ያደረጉት ጠቅላይ ሚኒስትር ዓብይ የካፋን ሕዝብ ባህልና ምድር በተለያዩ አገላለጾች ያሞካሹ ሲሆን፣ ‹‹ዓብይ! ዓብይ!›› እያለ የተቀበላቸውን ሕዝብ፣ ‹‹ለ2012 አዲስ ዓመት በሰላም አደረሳችሁ!›› በማለት መልካም ምኞታቸውን ገልጸዋል፡፡

‹‹2012 ኢትዮጵያን ከብልፅግና የሚያገናኝ ብቻ ሳይሆን፣ የተራራቁ ወንድማማቾች የሚጠያየቁበት ዓመት በመሆኑ እኛ ወንድሞቻችሁ ካለንበት ልንጠይቃችሁ መጥተናልና አዲሱን ዓመት የፍቅር፣ የብልፅግና፣ የሰላምና የመደመር ያድርግላችሁ፤›› በማለት በድጋሚ ምኞታቸውን ገልጸዋል፡፡

የካፋ ሕዝብ ለማዕከላዊ መንግሥት ሥርዓት የመተዳደር ልምድ ያለው፣ በሚካረቾ የአማካሪዎች ድጋፍ የሚደረግለት መንግሥት የነበረው መሆኑን፣ የኢኮኖሚና የማኅበራዊ ጉዳዮችን የሚመራ ተቋማዊ አደረጃጀት የነበረው መሆኑን፣ እንዲሁም ለፍትሕ የቆመ አስተዳደራዊ ሥርዓት የነበረው መሆኑን በመጠቆም፣ ይኼ ልምድ ሁሉም ኢትዮጵያዊ የሚከበርባትን ኢትዮጵያ ለመገንባት ትምህርት የሚሰጥ ነው ብለዋል፡፡ ስለዚህም፣ ‹‹ኢትዮጵያን የማስፋት እንጂ የማሳነስን ልምድ ለልጆቻችን የማናወርስ መሆኑን ልገልጽላችሁ እወዳለሁ፤›› በማለት ንግግራቸውን አጠናቀዋል፡፡

ከዚህ የስታዲየም ቆይታ በኋላ በዞን አስተዳደር አዳራሽ ከተሰበሰቡ የአካባቢው ማኅበረሰብ ተወካዮች ጋር ውይይት አድርገዋል፡፡ በዚህ የአዳራሽ ውይይት ለጠቅላይ ሚኒስትሩ ከመንገድ፣ ከውኃ አቅርቦት፣ ከጤና አገልግሎት፣ ከድልድይና ከሥራ ዕድል እስከ ክልልነት ጥያቄ የዘለቁ ጥያቄዎች የቀረቡላቸው ሲሆን፣ ሁሉም ጠያቂዎች ግን ሳያነሱ ያላለፉት ዞኑ በክልል እንዲደራጅ ለክልል ምክር ቤት የቀበረውን በክልል የመደራጀት ጥያቄ ነው፡፡

የመጀመርያውን ጥያቄ ያቀረቡትና ከነጋዴ ማኅበር ተወክለው እንደመጡ የጠቆሙ ወይዘሮ የክልልነት ጥያቄን የመጀመርያው ነጥባቸው በማድረግ ጥያቄ ያነሱ ሲሆን፣ ጥያቄው በተለያየ መንገድ ሲነሳ የቆየ ቢሆንም ዛሬ ግን ይኼንን ጥያቄ የምታነሱ ጠባብ ናችሁ የሚል ሳይኖር ሰሚ ያገኘ ጥያቄ በመሆኑ ደስተኛ መሆናቸውን ተናግረዋል፡፡

‹‹ክልልነቱ ቢሰጠን ብቻችንን እንኑር አላልንም፣ ሁሉንም አቅፈን እንኖራለን፤›› ያሉት ወይዘሮዋ፣ ዕምቅ ሀብት ያለውና ለማደግ የሚችል አካባቢ እንደሆነ ጠቁመዋል፡፡ ነገር ግን ይኼ ጥያቄ ሌላው ስለጠየቀ ዛሬ የሚጠየቅ አይደለም፤›› ብለው፣ እነዚህ ጥያቄዎች ሰላማዊ በሆነ መንገድ እየቀረቡ ነው ብለዋል፡፡

ከዚህ በተጨማሪም እስካሁን የሚመጡ ኢንቨስተሮች አካባቢውንም ሆነ ነዋሪዎችን የማይጠቅሙ እንደነበሩ በመጠቆም፣ ‹‹ጫካ መንጥሮ ጣውላ ሸጦ የሚወጣ ሳይሆን ጠንካራ ኢንቨስተር ይምጣ፤›› ሲሉም ጠይቀዋል፡፡

ጠቅላይ ሚኒስትሩም ሆኑ ከእሳቸው ጋር የመጡትን እንግዶች እንኳን ደህና መጣችሁ በማለትና በማመስገን የጀመሩት ሌላ የስብሰባ ተሳታፊ አባት፣ ራሱን በራሱ በንጉሣዊ ሥርዓት ሲያስተዳድር የቆየ ሕዝብ እንደነበር በመጠቆምና በኋላም በአውራጃና በእገሌ አገር ደረጃ ሲጠራ የቆየ አካባቢ በደቡብ ክልል መካተቱን በመጠቆም፣ ይኼ ለውጥ የሚጠላ ባይሆንም የዞኑን ነዋሪዎች የት ነው ያሉት በማለት የሚጠይቅ፣ ብሎም ክፍተቶች ሲገኙ የሚያስተካክል ሰው አለመኖሩ ቅር ያሰኛቸው ጉዳይ እንደሆነ ጠቁመዋል፡፡

‹‹ተሟግተን ወደ ላይ መውጣት አልቻልንም፣ አቅማችን አነሰ፡፡ ብዙ ነገር ነው የቻልነው፡፡ አሁን አደራ ለእናንተ እንስጥ ብለን ነው፤›› ሲሉም ዞኑ ለክልል ከተማ ያለውን ርቀት በመጥቀስ መፍትሔ ሽተዋል፡፡

በሌላ ወገን በሚሊኒየም አከባበር ብሔራዊ ምክር ቤት በዕቅድ ተይዞ የተገነባው ብሔራዊ የቡና ሙዚየም ከዓመታት በፊት በቀድሞ ጠቅላይ ሚኒስትር ኃይለ ማርያም ደሳለኝ ቢመረቅም፣ አገልግሎት መስጠት ሳይችል መቅረቱ ‹‹የብዙዎችን ቅስምና ልብ የሰበረ፤›› እንደሆነ ተናግረዋል፡፡

ሌላ ጥያቄ አቅራቢ የክልልነት ጥያቄ የሚነሳው እንዲሁ ከርቀት አንፃር ሳይሆን ፍትሕን ከማግኘት አንፃር ነው በማለት፣ ክልል ድረስ አመራሮች ለተለያዩ ጉዳዮች ሲሄዱ የሚወጣው ገንዘብ ብክነት እንደሆነና ለአካባቢው ልማት መዋል የሚችል እንደሆነም አክለዋል፡፡

‹‹እኛ ለብቻችን ክልል እንሁን ሳይሆን ከአጎራባች አብረውን ለመሆን የሚፈልጉ ካሉ እናቅፋለን፤›› ሲሉም አስረድተዋል፡፡

ከእነዚህ ጥያቄዎች በተጨማሪ የቦንጋ የመጠጥ ውኃ ፕሮጀክት ከመንገድ መቅረቱ፣ የሆስፒታል የተሟላ አገልግሎት የመስጠት አቅም አናሳ መሆን፣ እንዲሁም የአካባቢውን አቅም በማጥናት የኢኮኖሚ ቀጣና ማድረግ ይገባ እንደነበር በመጠቆም ጥያቄዎች ቀርበዋል፡፡

ከጥያቄዎቹ በመቀጠል ጠቅላይ ሚኒስትር ዓብይ ምላሽ ሰጥተዋል፡፡ ‹‹የልማትና የመሠረተ ልማት ጥያቄዎችን በሚመለከት እንዴት በበጀት በማካተት መመለስ እንደሚቻል እናያለን፤›› በማለት፣ ለቀዳማዊት እመቤት ዝናሽ ታያቸው ቤተ መጻሕፍትና ሌሎች ፕሮጀክቶችን እንዲሠሩላቸው የቀረበላቸውን ጥያቄ በማስመልከት የእሳቸው ጽሕፈት ቤት እንደሌለውና እንደ መንግሥታዊ ያልሆነ ተቋም በልመና የሚሠራ በመሆኑ፣ ገንዘብ ሲገኝ የሚታሰብበት ሥራ እንደሚኖር ጠቁመዋል፡፡

ለአካባቢውና ለነዋሪው የሚጠቅም ኢንቨስተር ለማምጣት ጥረት እንደሚደረግና እየተሠራበት እንደሆነ በመጠቆም ስለመዋዕለ ንዋይ ምላሽ የሰጡት ጠቅላይ ሚኒስትሩ፣ ‹‹እኛ ኢንቨስተር እንጋፋለን፣ እነሱም እየፈሩ መጥተዋል፤›› በማለት፣ በመዋዕለ ንዋይ አፍሳሾች ላይ የደረሱ የተለያዩ ጥቃቶች ባለሀብቶችን እያራቁ ነው ብለዋል፡፡

ነገር ግን ሕዝቡ ደኑን ለመጠበቅና ከተፈጥሮ ጋር ተስማምቶ ለመኖር ያዳበረውን ባህል በማድነቅ፣ ‹‹ሥርዓት የለመደ ካልሆነ በስተቀር ደን አስቀምጦ የሚቸገር ሕዝብ እኮ አይኖርም፤›› ብለዋል፡፡

የክልልነት ጥያቄን አስመልክተው ‹‹ዋናው ጥያቄ›› በማለት ምላሽ የሰጡት ጠቅላይ ሚኒስትሩ፣ ‹‹አደረጃጀትን የሁሉ ነገር መፍቻ አድርገን አንውሰድ፤›› በማለት ክልልነት መብት እንደሆነና የቀረቡት ምክንያቶችም ልክ እንደሆኑ ተናግረው ክልል ሆነው የቆዩት ‹‹ጋምቤላና ቤንሻንጉል ክልሎች እንደ እናንተ የመንገድና የድልድይ ጥያቄ እያነሱ ነው፤›› ሲሉም አስረድተዋል፡፡

ርቀትንም በሚመለከት ከሞያሌ አዳማ ያለው ርቀት፣ እንዲሁም ከምንጃር አካባቢ ባህር ዳር ድረስ ያለው ርቀት ጋር ተመሳሳይ ዓይነት ችግር እንደሚደቅን በመግለጽ በሌላም አካባቢ ያለ ችግር ነው ብለዋል፡፡

ሞያሌ ያለ ሶማሌ ጅግጅጋ ድረስ የሚሄደው ከ1,000 ኪሎ ሜትሮች በላይ በማቋረጥ እንደሆነ በመግለጽ፣ በሌላ ሥፍራም ያለ ጥያቄ ነው ብለዋል፡፡

‹‹ክልሉ ከእናንተ ጋር በመወያየት ለካፋ ሕዝብ የሚጠቅመው ይኼ ነው የሚል ከሆነ ለፌዴራል መንግሥት አይከብደውም፣ ምንም ማለት አይደለም፤›› ብለው፣ ‹‹ያሉትን ሕዝቦች ካሳመነ ማንም ሊያስቆም አይችልም፤›› ሲሉ ገልጸዋል፡፡

ሕዝብ ከተስማማበት የማይሆን ነገር የለም ያሉት ጠቅላይ ሚኒስትሩ፣ ይኼንን በሚመለከት የተጠናው ጥናት ሕዝብ ካልተስማማበት በሌላ ባለሙያ ማስጠናትና የተሻለ መፍትሔ መሻት ያስፈልጋል ብለዋል፡፡

ሆኖም ‹‹የዕለት ተዕለት ጥያቄን ብቻ እየመለስን ዘላቂ ሥራ ሳንሠራ እንዳንቀር፤›› በማለትም አሳስበዋል፡፡

ሙዚየሙን በተመለከተ በቂ መረጃ እንደሌላቸውና ለምን ወደ ሥራ መግባት እንዳልቻለ እንደማያውቁ በመግለጽ፣ ጉዳዩን በማጣራት በአቶ ርስቱ በኩል ምላሽ ይሰጣል ብለዋል፡፡

ከልማት ጋር ተያይዞ የተነሱ ጥያቄዎችንም በተመለከተ፣ ‹‹እኛ የተቀመጥነው እናንተን ለማገዝ ነው፤›› በማለት፣ ‹‹በተቻለ መጠን ለማገዝ ዝግጁ ነን፤›› ሲሉ መልሰዋል፡፡

ከውይይቱ መልስ የቦንጋ ጤና ጣቢያና የቡና ሙዚየምን ከጎበኙ በኋላ ማምሻውን ወደ አዲስ አበባ የተመለሱት ጠቅላይ ሚኒስትሩ፣ ይኼ ሁሉ ሚዲያ ወደ ሥፍራው የተወሰደው አካባቢውን በማየት መስህብነቱን እንዲያስተዋውቅ በማለም ነው ብለዋል፡፡

Source: Reporter  https://www.ethiopianreporter.com/article/16787?

Advertisements
Leave a comment

የክቡር ጠ/ሚ አቢይ አሕመድ የቦንጋ ጉብኝት ውጤት::


ፋንታዬ መኮ
መስከረም 5 ቀን 2012 ዓም
September 16, 2019

የክቡር ጠ/ሚ አቢይ አሕመድ የቦንጋ ጉብኝት ውጤት::

70672943_388282588772278_3114441907732742144_nምሥክርነታቸውን እንደሰጡት እንኳን ከሰው ልጅ ከራሱ አልፎ ከተፈጥሮም ጋር ተስማምቶ መኖር የሚችል ብልህ የሠለጠነና አስተዋይ ህዝብ ስለሆነ እንደ አመጣጣቸው አክብሮ ተቀብሎ በጉጉት የጠበቀውን የአስተዳደራዊ ጉዳይ እመርቂ መልስ ባያገኝም በትእግሥት ለመጠበቅ ወስኖ እንዳቅሙ አስትናግዶ በሰላም ወደ መጡበት ሸኝቷቸዋል:: ለዚህ ተግባር አስተባባሪዎችም ሆኑ መላውን ታዳሚ (ማህበረሰቡን) ባጠቃላይ በደቡብ ምዕራብ ኢትዮጵያ ህዝብ ህብረት (ደምኢህህ) ስም ላመሰግን እወዳለሁ:: እግዚአብሔር ይስጥልን ደስ ብሎናል::

በመቀጠል ጉብኝቱ ያልተጠበቀና ለዝግጅት እንኳ በቂ ግዜ ሳይሰጥ በሁለትና ሶስት ቀናት ውስጥ ይፋ መደረጉ የማንኛውንም ሚድያ ቀጥታ ሽፋን ያላገኘ የራሱ የደቡብ ሚድያን ጨምሮ ሲሆን ለማሕበራዊ ሚድያ ምሥጋና ይግባው ብዙም ባይሆን በFB በማስተጋባት ድምፅ አሰምተውለታል:: ጉብኝቱ በመግቢያ ንግግራችው እንዱገለፁት ወንድም የሆነውን ካፈቾ ለመጠየቅ በጎ ፈቃድ የመነጨ ከሆነ እሰየው:: ጀግናው የካፋ ጎርማሾ ሐዋሳ ላይ በደህዴን ተጠርቶ በክልል ጉዳይ አልደራደርም ብሎ አቋም ወስዶ ስብሰባውን ረግጦ በመውጣት ቅሬታውን በሰላማዊ መንገድ ገልፆ ወደ ቀየው መመለሱ ባለሥልጣናቱን አስበርጎት የሳቸው ጣልቃ ገብነት ክልል የመሆን ዓላማውን የሚያስቀይረው መስሏቸው ከሆነ ስህተት ይመስለኛል:: ያም ሆነ ይህ የጠ/ሚ ዶ/ር አቢይ አህመድ የመስከረም 4 ቀን 2012 ዓም የቦንጋ ጉብኝት ፍሬ አልባ አልነበረም ሆስፒታሉን ጎብኝተው በተመለሱ 24 ሰዓት ውስጥ የህክምና ልዑካን ቡድን ቦንጋ መግባቱ የመጀመሪያ መልካም እርምጃ ነው:: ነገር ግን አንገብጋቢው የክልል ጥያቄ እስካልተመለሰ ድረስ መዘናጋት አይኖርብንም::

ይህ ህዝብ ስለ እራሱ ምንንትና ማንነት ለመናገር በነራስ ወልደጊዮርጊስና ከዚያም በኃላ ካፋን እንዲያስተዳድሩ በየጊዜው በማዕከላዊ መንግሥት በተሾሙ መኳንንቶች ምኒሊክ “ለካፋ ህዝብ አትራራለት:: አጥብቀህ ግዛው:: ገብር ብለው አሻፈረኝ ብሎ ወታደሬን አስጨርሷል:: መሬቱን ነጥቀህ ገባር/ጭሰኛ አድርገው:: ሚስቱንና ልጆቹን ለወታደሮቼ እንዲገዙ አድርጋቸው:: ቤትና ንብረቱን አቃጥል ወዘተ ብለው የሰጡትን መመሪያ ተግባራዊ በማድረጋቸው መስከረም 4 ቀን 2012 ዓም ቦንጋ ላይ ያደረጉት ንግግር ከወረራው በፊት ጀግና የነበረው ህዝብ ሥነ ልቦናዊ ጫና በተደጋጋሚ እየደረሰበት ማንነቱን ክዶ ስሙን ሳይቀር ቀይሮ ይህን የመሰለ ጀግናና አኩሪ ታሪክ ያለው ወጣት ትውልድ ከፈቾ ነኝ ብሎ ደፍሮ ታሪኩን ከመናገር ይልቅ የሌላ ተለጣፊ ሆኖ የራሱን ታሪክ ጠንቅቆ ባለማወቁና ወላጆችም ከባድ ተፅእኖ እየተደረገባቸው ማንነታቸውን ለማስተላለፍ ሳይችሉ ቀርተዋል::

ሆኖም ከ2012 ዓም የጠ/ሚ ዶ/ር አቢይ ጉብኝት አንድ ትልቅ ትርፍ ካፈቾ አትርፏል:: ካፈቾ አፉን የተሸበበ ይመስል ስለ ካፋ ማንነት ስለሃገሩ ስለ ጀግንነቱ በአስተዳደራዊ መዋቅር የሰለጠነ እንደነበረ መናገር እየከበደው “ታሪክና ሃገር ያለኝ ካፈቾ ነኝ” ለማለት የማይደፍርበት የነበረውን የራሱን ጀግንነት ታላቅነት ራስን በራስ የመምራት ብቃት የዲሞክራሲ ባህል ለካፈቾ አዲስ እንዳልሆነ ወዘተ ዘርዝረውና ተንትነው ስለነገሩትና ማንነቱን ከሚያከብረው የለውጥ እራማጅ አንደበት ስለሰማ ትውልዱ አንብቦ ከተረዳው በላይ ሀቁን ስላስቀመጡለትና ስለካፋ የተሳሳተ አመለካከት ላላቸው ብሔረሰቦችና ህዝቦች ማነታችንን ካፋ ቡናን ለዓለም ከማበርከቱም አልፎ በዲሞክራሲያዊ አስተዳደር ቀደምት መሆኑን ለመላው ዓለም ምሥክርነትዎን ስለሰጡ ታሪክ በዚህ ሥራዎ ይመዘግቦታል በካፋ ህዝብ ልብም ለትውልድ ተቀርፆ ይኖራል::

ከላይ ከተጠቀሰው ትርፍ ውጭ የጉብኝቱ ውጤት ለሴረኞች ኪሳራን ለከፈቾ ድልን አስመዝግቧል::

– ጉብኝቱና ድንገተኛ ቢሆንም ካፈቾ አንድነቱን አስመስክሯል
– የተቻለውን ሁሉ ተጠቅሞ አቀባበል አድርጏል
– ጥያቄውን በሰላማዊና በሰልጠነ መንገድ አቅርቦ መልስ በመጠባበቅ ላይ ይገኛል
– ያለ እንድ ኮሽታ ወደመጡበት በሰላም ልዑካኑን ሸኝቷል::

ጥቂት ጥያቄዎችን ለጠቅላይ ሚኒስትሩ የጋዜጠኝነት ሙያ ባይኖረኝም

(ሀ) አጠቃላይ ጉብኝቱን አስመልክተው መግልጫ ቢስጡ ሌላው የኢትዮጵያ ብሔር ብሔረሰብ እርስዎ እንዳሉት ከካፈቾ የሚማረው ለምሳሌ የሰው ህይወት ሀብትና ንብረት ሳይወድም በስለጠነ ሰላማዊ መንገድ ትግል ማራመድ መቻሉን

(ለ) ካፋ ለዓለም የቡና መገኛ ብቻ ሳይሆን የዲሞክራሲን ቀደምት አራማጅ ሆኖ ለብዙ ዘመን ሀገር መምራቱን ሌላም ሌላም

በመጨረሻም ተበደልኩ ፍትህ ፈልጋልሁ ለሚል ህዝብ አፋጣኝ ምላሽ መስጠት ወቅታዊና ተገቢም ነው:: ይህ ጊዜ ገንዘብና ጉልበት የባከነበት ጉብኝት የሚድያ ሽፋን ቢሰጠው መልካም ነበር:: ክልል መሆን ይጥቀመውም አይጥቀመውም ህዝቡ ለይቶ ያውቃል:: የቡና ባለቤትነትን ጥያቄ መመለስ ታሪክ ከማገላበጥ ውጭ ጥናት አይፈልግም ሌላ እጀንዳ ከሌለ በስተቀር:: የሙዚየሙም ጉዳይ አፋጣኝ ምላሽ ያሻዋል ንብረት እየባከነ ስለሆነ:: የቡና ፓርክ መግንባት ያለበት ካፋ እንጂ አዲስ አበባ መሆን አይገባውም:: ክልል መሆን ጥቅም ካላመጣ ለሲዳማ ለምን ተፈቀደ? ካፋ ሀብታም ነው ትግራይ ክልል በመሆኑ ምን ተጎዳ? ጋምቤላም በመሰረታዊ ልማት ከካፋ የላቀ ደረጃ ላይ እንደሚገኝ ግልፅ ነው:: የጊዜ ጉዳይ ሆነና ፊተኞች ኃለኞች እንዲሆኑ ተደርገዋል::

ሕገ መንግሥቱ የሰጠን መብት ላይ አንደራደርም
የቡና መገኛ በየትኛውም መስፈርት ካፋ እንጂ ሌላ ቦታ ወይም በጥቅሉ ምዕራብ አከባቢ ሊባል አይገባም::

ፋንታዬ መኮ
መስከረም 5 ቀን 2012 ዓም
September 16, 2019
ካፋ ሚድያ Kaffamedia

Leave a comment

በጠቅላይ ሚ /ር ዶ/ር አቢይ አህመድ ጉዞ የተሰሙኝ 3 እይታዎች


Amanuel Karlo Gano

በጠቅላይ ሚ /ር ዶ/ር አቢይ አህመድ ጉዞ የተሰሙኝ 3 እይታዎች70672943_388282588772278_3114441907732742144_n
ባብዛኛው አጅግ የተደሰትኩበት ሲሆን አንዳንድ ቅሬታዎቼንም ሳልደብቅ አጋራለሁ::

በ1ኛ: ደረጃ: ምንም ያህል አንደ ካፋ ህዝብ ጉጉትና ፍላጎት ጉብኝታቸዉ የዘገየ ቢሆንም ጊዜ ሰጥቶ ክቡር ጠቅላይ ሚኒስትር ዶ/ር አብይ አህመድ: ከክቡር ምክትል ጠቅላይ ሚኒስትር ደመቀ መኮነን: ከክቡር የመከላከያ ሚኒስትር ኦቦ ለማ መገርሳ አንዲሁም ከክብርት ቀዳማዊት ኢሜበት ዝናሽ ታያቸዉ ጋር በመሆን ካፋን መጎብኘታቸዉና በተለያዩ መድረኮች ሲነሱ የቆዩትን የካፋ ህዝብ ጥያቄዎች ከህዝቡ አንደበት መስማት መቻላቸዉ በኔ አይታ ትልቅ ነገር ነው:: ከዚህም ይበልጥ ባለፉት 28 አመታት ተደፍኖና ታፍኖ: ተረስቶ የቆየዉ የማንነት ገናና ታሪካችን: አኩሪ እትዮጵያዊነታችን: ከመሃላችን የኖሩትን ማንኛዉንም የአትዮጵያ ልጆች አቅፈን አብሮ የመኖር ባህላችን: ከሰዉም አልፎ የተፈጥሮን ደን ጠብቀን ለትዉልድ ስናሸጋግር የቆየን ህዝብ መሆናችን:: 20 ነገስታትን በሰላም ከስልጣን ወደ ስልጣን ስናሸጋግር የቆየን ስልጡን ሕግና ስነስርዓት ያለን: የራሳችን ፓርላማና ምክርቤት (ምክረችኦ): አንዲሁም የተለያዩ የስራ ዘርፎችን የሚመሩ አንዴዎደራኖ: ጉቸራኖ: የመሳሰሉ በዛሬዉ ሚኒስቴር ደረጃ የነበሩ መሪዎች የነበሩን: ህዝብ መሆናችን:: የአስተዳደር ታሪካዊ እሴቶቻችን ለዛሬዋ ኢትዮጵያ አጅግ የምያስፈልጔት አንደሆነም ጭምር በትናንትናዉ እለት በጠቅላይ ሚ/ሩ አንደበትና በቦታዉ በነበሩት በአባቶቻችንም አንደበት ጭምር መስማታችንና በስፍራው በተገኙት ብሔራዊ የሚድያ ኔትዎርኮች አማካይነት የአትዮጵያ ህዝብ ገናናዉን የካፋ ህዝብ ታሪክ መስማት መቻሉ በኔ አይታ ለካፋ ህዝብ አንድ ድል ነው::

በ2ተኛ ደረጃ አንደ ታላቅ ድል የያዝኩት አሁንም ላለፉት 28 አመታት ለመጀመርያ ያየሁት: እንደ አንድ ህዝብና አንደ አንድ ቡድን: የካፋ ምክር ቤትና የርዕሰ መስተዳድሩ: የካፋ ጉርማሾ: የተለያዩ የካፋ አክትቪስቶች: የካፋ: ምሁራን: የደቡብ ምዕራብ ኢትዮጵያ ህዝብ ህብረት ተወካዮች በአንድነትና በአንድ ግንባር ቆመን የህዝባችንን አንኴር ጥያቄዎች ማንሳት መቻላችን ነው:: ጥያቄአችን የተፈለገዉን መልስ ባያገኝ አንኴን ይህ በቀላሉ የምናየዉ ድል አይደለም:: በአንድነትና በአንድ ድምፅ ከህዝባችን ጎን ከቆምን የማንፈነቅለው ድንጋይ የማንገለብጠዉ: ተራራ: አይኖርም:: ጊዜ ይወስድ አንደሆን አንጂ የማናስመልሰዉ ጥያቄም አይኖርም:: የዛሬዉ አንድነት በግልፅ የሚያሳየን ለመጀመርያ ጊዜ ለራስ ትርፍ ሳይሆን ለካፋ ህዝብ ብሶት የሚኒቆረቆር: የካፋ ልጆች አንድ መሆንና በአንድነት መቆም መቻላችንን ነዉ:: ለካፋ በአንድነት በመቆም የህዝባችንን መብትና ህልዉና ማስከበር ከቻልን ለሀገራችን ኢትዮጵያም ኢትዮጵያዊነት ማንነታችንን አንደኛ ከሚወዱ ወገኞች ጋር አብረን መቆም እንችላለንና የኛ በአንድነት መቆም ትርፉ ለካፋ ብቻ ሳይሆን ለአኢትዮጵያም ጭምር ነው ብዬ አምናለሁ::

በ3ተኛ ደረጃ ለተነሱ ጥያቄዎች በተሰጡ መልሶች ዙርያ አንድ ሁለት ነገር መናገር እፈልጋለሁ::
1: ለክልል ጥያቄ የተሰጠዉን መልስ በተመለከተ ተስፋ የምያስቆርጥ ነገር አላየሁም:: ጥያቄዉ በአዎንታ ወይም በአሉታ የሚመለስበት መድረክም አልነበረም:: ለኔ ዋናዉ የህዝቡን የጥያቄ ይዘትና ትክክለኛ ምክንያት ጠ/ሚ ከህዝቡ አንደበት መስማት መቻላቸዉ ነዉ:: ምክንያቱም ህዝቡ ሌሎች ስላነሱ ሌሎችን ኮርጆ ያነሳው ጥያቄ ሳይሆን ላለፉት28 አመታት ሲካሄድ ለቆየዉ የህዝብ ስቃይ የፍትህ ጥያቄ ነዉ:: ዉሳኔዉ የሚሰጥበት የራሱ ሕጋዊ መዋቅር ያለዉ ጉዳይ ስለሆነ አሁንም ሳንታክት መስፈርቶቹን በሙሉ አሟልተን የምንቀጥለዉና የምንጠይቀዉ ጉዳይ ይሆናል:: አንግዲህ አንደቀሞዉ አባባል ”ሰማይ አይታረስ ንጉሥ አይከሰስ” የሚባለው አሁንም ይሰራል ካልተባልን በስተቀር ህገ መንግስቱ በግልፅ ያስቀመጠዉ ጉዳይ ስለሆነ የሕግ ከለላም ይኖረናል::

2: የቡናን መገኛና ባለቤትነትን በተመለከተ ለተነሳው ጥያቄ የተሰጠዉ መልስ: አልደብቃችሁም አሳዝኖኛል አስቆጥቶኛል:: ከዚህ ቀደም የፌደራል መንግስት ወስኖ ያፀደቀዉ ጉዳይ ቢሆንም አሁንም ለዉዝግቡ ክፍት መንገድ ተሰቷል።
ይህንን ዉዝግብ ለአንዴና ለመቸረሻ ለመዝጋት ጥሩ አጋጣሚ ነበር: አጋጣሚዉ ግን ታልፏል:: የቡናና የካፋ ቁርኚት ከአትዮጵያ አልፎ ዓለም ያወቀው በታሪክ ፅሁፎች ብቻ ሳይሆን በአርክኦሎጂ ሳይንስም ድጋፍ ያለዉ በመሆኑ እዉነቱ ቢፈርጥ መልካም ነበር። ስለካፋና የካፋ ነገስታት ተነስቶ በዘመኑ ወደ ካፋ ሲጎርፍ ለነበረዉ ንግድ አንደኛዉና ታላቁ ምክንያት የቡና በካፋ መገኘት መሆኑ ሳይጠቀስ ሊታለፍ አይገባም:: ከዝያም አልፎ ለጅማ አድገት በወቅቱ ከነበሩት ዋንኛ ምክንያቶች አንዱ በንጉሥ አባ ጅፋርና ከርሳቸዉም ቀድመዉ በጅማ አካባቢ በነበሩት የኦሮሞ ባላባቶች ከካፋ ከሚጫነዉ ቡናና ቂመማ ቂመምን ከመሳሰሉ የሸቀጥ ንግዶች የሚሰበሰበዉ የቀረጥ ገቢ አንደነበር በታሪክ መረጃዎች የተደገፈ አዉነት ነው:: ስለዚህ አኛ ጅማን ያለማነዉ የካፋ ክፍለሀገር ዋና ከተማ በነበረችበት ጊዜ ብቻ ሳይሆን ከካፋ ነገስታት ዘመን ጀምሮ ነዉ::

ማጠቃለያ::
ደስታችንና ቂሬታችን አንዳለ ሆኖ የክቡር ጠ /ሚ መምጣት ለካፋ ሕዝብ በብዙ መልኩ ፋይዳ ያለው ነበርና ምስጋና ይገባቸዋል:: ሌላዉ ቢቀር መምጣታቸዉ የህዝባችንን ጥያቄዎች ለማስመለስ አጅግ ተጠናቅረንና ተግተንመስራትናመቀጠልአንዳለብን አስታውሶናል::

የካፋ ህዝብ የህልዉና ትግል አሁንም በአዲስ ዓመት በአዲስና በተጠናከረ መልኩ ሰላማውነትና ስብዕና በተመላበት መልኩ መቀጠል አለበት:: በከፍተኛ በደልና የፍትህ መጔደል ላይ ተመርኩዘው የተነሱ የካፋ ህዝብ ጥያቄዎች ፍትሃዊ መልስ አስክያገኙ ድረስ ትግሉን መቀጠል ግድ ይላል:: ሳንታክትና ተስፋ ሳንቆርጥ ከተጋን በተለይ ዛሬ አንዳሳየነዉ በአንድ ድምፅ በአንድነት መጔዝ ከቻልን ከግባችን አንደምንደርስ አኒጠራጠርም::

ፍትህ ለካፋ ህዝብ::
ኢትዮጵያ ለዘላዓለም ትኑር::

Leave a comment

ጆሮ ለባለቤቱ ባዳ ነው


ጆሮ ለባለቤቱ ባዳ ነው

ሰሞኑን በAugust 13,2019 Kaffamedia በFB ድህረገፁ ላይ የካፋ ቦንጋን ብሔራዊ ቡና ሙዚዬምን አላውቅም ያለው ቡናና ሻይ ልማት መ/ቤት አአ ላይ የቡና ፓርክ እገነባለሁ ማለቱን ያስፈረውን አስደንጋጭ አሳፋሪና አስዛኝ ዜና ስመለከት ዓይኔንም ጆሮየንም ማመን አቃተኝ: በህልምና ቅዠትም መካከል ያለውን ልዩነት መረዳት ተሳነኝ:: ዛሬ ላይ ሁሉ ነገር ከሃገርና ከሕዝብ ጥቅም ይልቅ በዘር መነፅር በመመልከትና እኛ ብቻ ተጠቃሚ እንሁን የሚሉት ምሁር ነን ተብዬ ደደቦች ሃገሪቱን ወዴት እያመሩ ነው? ስለ ሀገር አንድነት የሚያቀነቅኑት የጠ/ሚኒስትር ዶ/ር አቢይ አህመድስ ሥልጣን ምን ላይ ነው? በሙሉ ለብሔራቸው (ያዩትን ሁሉ ለሚመኙ ዘረኞች ካስረከቡ በግልፅ ይንገሩን:: አሁን ላይ የካፋ ምድር ለምለምነት ያስጎመጃቸው የካፋን ምድርና ሕዝቧን በጨለማ አኑረው መሬቱንም ሃብቱንም ለመቆጣጠር እያሉ በስውር ደባ እየሸረቡ ይገኛሉ:: ያለነው ድንጋይ ዳቦ ዘመን ላይ ሳይሆን 21ኛው መቶ ክ/ዘመን ማብቂያ መረጃ በመዳፋችን ውስጥ ባለበት ዘመን ላይ መሆናችንንና በዓለም ዙሪያ በተለያዩ የሰብዓዊ መብት ጥብቃ ህጎች መኖራቸውን የረሱት ይመስላል:: ታሪክ አይሰረቅም:: ሌቦችንና ወራሪዎችን በፅኑ ማውገዝ ብቻ ሳይሆን የካፋም ሆነ የደቡብ ምዕራብ ኢትዮጵያ ህዝብ በህልውናው ላይ በሚቃጣው አደጋ አይደራደሩም::

የቄስ ሚስት አወቅሽ አወቅሽ ቢሏት የቄሱን መፅሐፍ አጥባ ቄሱ ከቤተክርስቲያን ወደ ቤት ሲመለሱ ለዘመናት ጠብቀው በጥንቃቄ ያቆዩት መፅሐፎቻቸውን መሀይሟ ባለቤታቸው አውድማ ጠበቀቻቸው:: ቀደም ብለው የማይመለከታት ሥራ ውስጥ እንዳትገባ ባለማድረጋቸው: ዛሬ ላይ ድግሞ ለዘመናት አብሮ ይኖር የነበረውን የኢትዮጵያን ህዝብ በዘር ፓለቲካ ከፋፍለው ጉልበተኛው በጉልበት እንዲጠቀም እየፈቀዱ ዘመን የተሻገረውንና ከአያት ቅድመ አያቶቻችንና ካባቶቻችን የወረስንውን አኩሪ ታሪክና ሀገር በሴረኞችና በዘር ፖለቲካ ቁማርተኞች ቁጥጥር ሥር በማዋል ሀገር አልባ በማድረግ በሀብትና ንብረቱ ተጠቃሚ (ያለፈው አልበቃ ብሏችው) ላለማድረግ የሰብአዊ መብቶችን በተፃረረ መልኩ ህዝባችንን ለዳግም ጭቆናና ብዝበዛ ለመዳረግ የማይፈነቅሉት ድንጋይ የለም:: ጊዜ የሰጠው ቅል ድንጋይ ይሰብራል:: ከታሪክ እንደተረዳነው የካፋን ልዑላዊነት በመፈታተን የሸዋ መሳፍንትና የኦሮሞ ወራሪዎች ከመቶ ዓመት በፊት ተደጋጋሚ ሙከራ ቢያደርጉም በየጊዜው የተነሱት የካፋ ነገሥታት በጀግንነት ተዋግተው የሽንፈት ሸማ አከናንበው ወደ መጡበት እንዳባረሯቸው በተለያየ ጊዜ የተነሱ የታሪክ ተመራማሪዎችና ፀሐፍት መዘገባቸውን የታሪክ ማህደር በማገላበጥ ሀቁን መረዳት ይቻላል::

ምን ያድርጉ ህግና ሥርዓት በሌለበት ሀገር “አባት ዳኛ ልጅ ቀማኛ” እንደ መሀይሟ የቄሱ ባለቤት ሀገርና ታሪክ ሲያወድሙ “ተው ተሳስታችኃል የሚል ዳኛ በመጥፋቱ ሀገር እያመሱ ይገኛሉ::

ጠ/ሚ ዶክተር አቢይ አህመድ ከዓመት በፊት ወደ ሥልጣን ሲመጡ በተዋቡ ቃላት የኢትዮጵያን ህዝብ ስሜት ከተቆጣጥሩ በኃላ ኢሀዲግን ድርጅቴ እያሉ ቁርኝታቸውን ሲገልፁ በሌላ በኩል የዋሁን የኢትዮጵያን ህዝብ “ስንኖር ኢትዮጵያዊ ስንሞት ኢትዮጵያ” በማለት ፍቅርን እያቀነቀኑ በኢሀዲግ አመራር የተንገሸገሸውን ኢትዮጵያውያዊ ልብ ሰርቀው ነበር::

ሁሉን ነገር ትተን በፍቅር እንሻገር ሲሉት የጨነቀው እርጉዝ ያገባል ስትወልድ ጥሎ ገደል ይገባል እንዲሉ መገዳደል ያብቃ እስር ቤቶች ሙዝየም ይሁኑ በሰላም ለመኖር መደመር ነው የሚያዋጣን (የቀማ ሳይመልስ የበደለ ሳይከሰስ) በደለኞችን በይቅርታ እንለፋችው የውጭ ግንኙነት እናዳብር ዳያስፖራው ወደ ሀገሩ ገብቶ በፈልገው መስክ በሀገሩ እድገትና ብልፅግና ላይ ይሳተፍ (ብቻ 1 ዶላር በቀን ይስጥ) ተቀናቃኝ የሚለው የፓርቲዎች ታፔላ ወደ “ተፎካካሪ” ይለወጥና ሀገራቸው ይግቡና ለምርጫ ይደራጁ “ሁሉንም እሺ እሜን” የፓስተሩ ስብከት ህዝቡ ሁሉንም ነገር እርሶ እንዳሉ ሜዳውም ፈረሱም ይኸውልዎት እንደፈለጉ አሉና ገና ከአፋቸው የሚውጣውን ቃል በቅጡ ሳያዳምጥ ማስተጋባትና ማጨብጨብ አዎንታ እንጂ ማንም አሉታዊ ምላሽ ለመስጠት የደፈረ ኢትዮጵያዊ ምሁርም ሆነ ተፎካካሪም በሉት ተቀናቃኝ የፖለቲካ ድርጅት የሃይማኖት መሪ አለመኖሩ ዛሬ ላይ ብዙዎቻችን ራሳችንን መጠየቅ ከጀመርን ውለን አድረናል::

በሚያማልል ርቱእ አንደበት ከሊቅ እስከ ደቂቅ ተጠልፎ ያልወደቀ ለውጥ የተጠማ ኢትዮጵያዊ ጥቂት ሲሆን ያንን ሁሉ የዋህ ህዝብ የሞቀና የደመቀ አክብሮት ዓመት ሳይሞላው የአንታርቲክን በረዶ አምጥተው አወረዱበት:: ስሜቱን አቅዘቀዙት ተስፋውን አጨለሙበት:: ከድጡ ውደ ማጡ ሆነበት::የፍቅር ሐዋርያውና ፓስተሩ መሪ የኢትዮጵያ ሙሴ ቃላቸውን መጠበቅና ህዝቡን ወደ ታለመው እድገትና ብልፅግና ማሽጋገር ተሳናቸው:: እሁን አስፈላጊ ከሆነ ጥይትም አለን አሉ: ህገ መንግሥቱን እራሳቸው ናዱት::ከጎናችው የተሰለፈን ህዝብ አሳዘኑት::

ኢትዮጵያዊ ኢትዮጵያዊነቱን ነብር ዥንጉርጉርነቱን አይለውጥም እንዲሉ ተኩላም ምንም የበግ ለምድ ለብሶ ከበጎች ጋር ለመመሳሰል ቢሞክርም ተፈጥሮው ግድ ስለሚለው በግ ሊሆን በምንም መንገድ አይችልም:: ውሎ አድሮ ተኩላነቱ ይጋለጣል:: አሁን ላይ ኢትዮጵያ ውስጥ እየተንፀባረቀ ያለው እውነታ ይህ ነው::

የዚህ ፅሑፍ አቅራቢ በማወቅም ሆነ ባለማወቅ በጠ/ሚ ግሩምና አፍ አስከፋች ንግግር ከተጠለፉት ኢትዮጵያውያን መካከል አንዱ እንደነበርና ብዙ ኪሎ ሜትር በመጏዝ ለመደመር የበቃ ቢሆንም ውሎ አድሮ ግን በሃገር ውስጥ መቀነስ እንጂ መደመር ያለመኖሩን ሲረዳ ልቡ በሐዘን ጦር ክፉኛ እየደማ ይገኛል::

በጠ/ሚ ዶ/ር አቢይ አህመድ ላይ ጥርጣሬ ያሳደረብኝ የመጀመሪያው የፖርላማ ንግግር ነበር:: የኢትዮጵያን ብሔር ብሔረሰብ በዝርዝር እያነሱ ሲያወድሱ በንቀትም ይሁን ባለማወቅ የታሪክ ባለቤትና የቡና መገንኛ ብሎም የኢትዮጵያ የኢኮኖሚ የጀርባ አጥንት የሆንውን በተለይም እትብታቸው የተቀበረበትን አፈር ፈጭተው ጭቃ አቡክትው ያደጉባትን ምድር የኢትዮጵያ አካል ካፋን ለይተው በዝርዝሩ ውስጥ ለማካተት ያልቻሉበት ምክንያት በግልፅ ባይታወቅም ጉዳዩ እህል ላበደረ አፈር ወርቅ ላበደረ ጠጠር ሆነብኝ:: የተዉለዱባት አጋሮ የካፋ አካል ስትሆን ጅማ ደግሞ የካፋ ምድርና የካፋ ዋና ከተማ መሆኗን ሌላው ቢቀር በሳቸው የእውቀት ደረጃ ጠፍቷችው ይሆን ወይንስ ሌላ ድብቅ ሴራና አጀንዳ ከመጋርጃው በስተጀርባ አለ በማለት ጥርጣሬ አጫረብኝና በትለያየ ጊዜ የሚያደርጉትን ንግግር መከታተል ጀመርኩና አንድም ቀን በየትኛውም ሥፍራ የካፋን ስም አንስተው አያውቁም ለምን????:::::::: ሰሞኑን እየወጡ ያሉ መረጃዎች ለጥርጣሬው ፍንጭ እየጠቆሙ ይመስላል:: የቡና ሙዚየም ሥራ ይጀምር መልስ የለም:: የክልል ጥያቄ ሲንሳ ማስጥንቀቂያ:: በሰላምዊ ህዝብ ላይ የኮማንድ ፖስት ጋጋታ እኮ ለምን??? ዛሬ ደግሞ የቡና ፓርክ አአ ላይ ለመገንባት ለምን አስፈለገ? ግንባታው መሆን ያለበት ካፋ ውስጥ ቦንጋ አልነበረም ወይ? ይህ ሁሉ ደባ የካፋን ሕዝብ ማሳጣትና የቡና ባለቤት እንደመሆኑ መጠን ከቡና ኢኮኖሚ እንዳይጠቀም የተደረገ ግልፅ ሴራ አይደለም ወይ? ይህም በካፋ ሕዝብ ላይ ጦርነት ማወጅ ነው ብሎም እናንተ ኢትዮጵያዊ አይደላችሁም ማለት ነው::

ምንም እንኳን በበደል ላይ በደል በግፍ ላይ ግፍ ቢደራረብበትም ህዝቡ ጠ/ሚሩ ወደ ሥልጣን ሲመጡ ያቀረቡትን “የመደመር” ጥይቄ ሞቅ ደመቅ ባለ ሰላማዊ ሰልፍ በነቂስ ወጥቶ ሹመት ያዳብር ከጎንዎ ነን ብሎ ቃል ኪዳን ገብቶ ወደቤቱ ትመልሶ ከነገ ዛሬ ከተማችንን ጎብኝተው ብሶታችንን አዳምጠው ሌላው ቢቀር ያበረታቱናል ብሎ መንገድ መንገድ ሲያይ ከየዋሁ ህዝብ ጅርባ ደባ እየተሰራበት መሆኑን የተረዳው ቡና የካፋ ሳይሆን የኦሮሚያ ነው የሚለውን መርዶ የሰማ እለት ነው:: ህዝቡ ጆሮውን ማመን አቃትው:; ነገሩ ግልፅ ሲሆንለት በነቂስ ወጥቶ በህልውናው ላይ እንደማይደራድር አምስት ቀን የፈጀ ሰላማዊ የተቃውሞ ድምፁን ቦንጋ ላይ አሰማ::ሌላው የሚገርመው በተለያየ አጋጣሚ የድርጅታቸውን ክልል ህዝብ በወርቅ ሲመስሉ ለሌሎች ክልሎችም የተለያየ ዝናና ክብር ሲችሩ የደቡብ ምዕራብ ኢትዮጵያ ህዝብ መፈጠሩን ሳያውቁ እሳችው ልባቸው ውስጥ ተደብቆ ያለው (ለኦሮምያ የገቡትን ቃል ኪዳን ለመተግበር የቡና መገኛን የኦሮሚያ ክልል ነው ለማለት እየዳዳቸው የታሪክ ሌቦችን በመደገፍ የተዛባ አመለካከት ለመፍጠር ለዓለም ለማስተዋወቅ ላይ ይገኛሉ:: ኦሮሚያም ጅማን ዳኛ በሌለበት ሀገር ከነሽፈራው ሽጉጤ ጋር በተደረገ የውስጥ ለውስጥ ስምምነት ባለቤት የሆነውን የካፋን ህዝብ ነቅለው የራሳቸው ለማድረግ ካፊቾን በማፈናቀል ኦሮሞን በብዛት ከሌላ አካባቢ እያመጡ በማስፈር ላይ እንደሚገኙና ውለው አድረው ካፊቹን ለማስወጣት እቅድ እንዳለ ጅማ ውስጥ በስፋት ይነገራል:; ሌላውና የሚደንቀው ጉዳይ ደግሞ ሰሞኑን በተነሳው የክልል ጥያቄ ለካፋና ወላይታ ባለሥልጣናት ማስጠንቀቂያ ተሰጥቶ አካባቢውም ላይ ህዝቡ ነፃነቱን ያለበቂ ምክንያት ተነጥቆ ትንፍሽ እንዳይል በግዞት ላይ በኮማንድ ፖስት ቁጥጥር ሥር መውደቅ አሳዛኝና አሳፋር ድርጊት ነው::

ምንም እንኳን በጭቆና ላይ ጭቆና በግፍ ላይ ግፍ ቢደራረበትም የካፋ ሕዝብ ወይም የደቡብ ምዕራብ ኢትዮጵያ ህዝብ ሁሉንም እንዳመጣጡ በአስትዋይነት ተቀብሎ በማስተናገድ ከዛሬ ነገ የጠ/ሩ አመለካከት ይሻሻል ይሆናል ጊዜ እንስጣቸው በማለት የለውጥ አጋርነትን ከመደመር ጀምሮ ሊያሳያቸው ቢሞክርም ያዳቆነ ሰይጣን ሳያቄስ አይተውም እንዲሉ እሳቸውና አስተዳደራቸው ከመጋረጃ በስተጀርባ እያሴሩ ያሉትና እስትራቴጂ የነዱፉት ይህን ህዝብ ሀብትና መሬቱን ተነጥቆ ለባለግዜዎች ገፀ በረከት አቅርበው ሥልጣን ከኢሀዲግ ወስደው የሥልጣን ዘመናቸውን ለማራዘም እየሞከሩ ያለ ይመስላል:: ሰሞኑን ከክልል ጥያቄው ራሱን እንዲያገል በደህዴንና በግብረ አበሮቹ አማካይነት ካፋ እንዳይበረታ እንዳይጠነክር ለማድረግ ሽር ጉድ እያሉ ባሉበት ወቅት መቸም ጆሮ አልሰማ አይል ዛሬ ደግሞ አስደንጋጭና አደገኛ የሆነ ዜና ከወደ አዲስ አበባ እየተናፈሰ ይገኛል:: ግዛኝ ግዛኝ ብለው ለመሽጥ አሰበኝ እንደተባለው እየሆነ ነው ነገሩ::
የቡና መገኛው ካፋ እንጂ አአ አይደለም ወደዳችሁም ጠላችሁም ይህ አያከራክረንም:: ህልም ማለምና መመኝት መብታችሁ ነው ቅዠትም መቃዠት ትችላላችሁ:: እኛ አያገባንም አይመለከተንም:: መለስ “መላጣ ማለት ይቻላል ችግር የሚሆነው መላጣው በጣት ሲነካ ነው” ብሏል

እሁን ላይ ህዝቡ የሚጠይቃችው አንገብጋቢ ጥያቄዎች::

1. የክልል ጥያቄ መልስ በአስቸኳይ እንዲሰጠን እንጠይቃለን
2. ቦንጋ ላይ የተገነባው የቡና ሙዝየም በአስቸኳይ ሥራ እንዲጀምር የታሰበውም የቡና ፓርክ በቦንጋ እንዲገነባ እንጠይቃለን
3. በ50 ሚልየን የአሜሪካን ዶላር ሊገነባ የታቀደው የቡና ፓርክ በተገቢው ቦታ ካፋ ውስጥ መሆን አለበት እንጂ አዲስ አበባ ላይ መሆኑን በጥብቅ እንቃወማለን እናወግዛለን::
4. ከህዝቡ እውቅና ውጭ በህልውናው ላይ የሚሽረበውን ደባና ስምምነት አጥብቀን እናወግዛለን
5. በራሱ ሀብት ላይ መወሰን ያለበት የካፋ ህዝብ እጂ በቡናና ሻይ መስርያ ቤት አአ የተሰገሰጉት ዘረኞች አይደሉም
6. የቡና መገኛ ካፋ እንጂ አአ አይደለም::
7. በሀገር ጉዳይ ላይ ካፋ መገለል የለበትም
8. በህልውናውና በኢትዮጵያዊንቱ አይደራደርም

ድል ለተጨቆኑ ህዝቦች
ክልላችን ካፋ ነው
የጊዜ ጉዴይ እንጂ ኢትዮጵያ በነፃነት ለዘለዓለም ትኖራለች:: ጠላቶችዋ ግን ይወድማሉ::
ፋንታዬ መኮ
ካፋ ሚድያ kaffamedia

Leave a comment

ክፍል ሁለት:- ይድረስ ከጊቤ እስከ ኦሞ ከበደሌ አጋሮ እስከ ማጂ ቤንች ያላችሁ የቀድሞ ካፋ ክ/ሀገር ወይም የደቡብ ምዕራብ ኢትዮጵያ ምሁራን የእናሪያ የጎንጋ ቤተሰብና ሕዝብ::


ክፍል ሁለት

ይድረስ ከጊቤ እስከ ኦሞ ከበደሌ አጋሮ እስከ ማጂ ቤንች ያላችሁ የቀድሞ ካፋ ክ/ሀገር ወይም የደቡብ ምዕራብ ኢትዮጵያ ምሁራን የእናሪያ የጎንጋ ቤተሰብና ሕዝብ::

ክፍል እንድን ሳጠናቅቅ ሃሳቤን መቋጨት ባለመቻሌ በይደር ክፍል ሁለትን ይዤላችሁ እንደምመለስ ቃል ገብቼ ነበር:: መቸም ምሁራን በማንበብ አትታሙም ተግባራችሁ የሚያጠነጥነው እውቀት ላይ ነውና:: ጥቂቶቻችሁ ጊዜ ወስዳችሁ ፅሑፌን አንብባችሁ አስተያየት የስጣችሁኝ ለጋደኞቻችሁ (Share) ያደረጋችሁ ወዳጆቼ መረጃ መለዋወጥ እውቀት ያዳብራል (awareness) ይፈጥራልና ምሥጋናየ ይድረሳችሁ:: እድል አግኝተን በአካል ተገናኝተን ቁጭ ብለን ብንወያይ እንዴት ደስ ባለኝ:: ማን ያውቃል አንድ ቀን የክልል ጥያቄ ከተመለሰ ከያለንበት ተስባስበን የበደልነውን ህዝብ ክሰን እኛም ይቅር ተባብለን ንስሀ ገብተን ጉልበታችንንና እውቀታችን አስተባብረን ህዝባችንን ከድህነትና ኃላ ቀርነት እናላቅቀው ይሆናል:: የጅግናውን ንጉሠ ንገሥት ጋኪ ሽሮቾን ታሪክ በመዘከር::

ውድ ምሁራኖች ዛሬ ላስታውሳችሁ የምፈልገው ሀገሬ ምን ሰራችልኝ ሳይሆን እኔ ለሀገሬ ምን ሰራሁላት; ወገኔ ምን አደረገልኝ ሳይሆን እኔ ለወገኔ ምን አደረግኩለት የምለውን አስተሳሰብ ነው:: ለምን ብትሉ እውነት ለምናገር መቀበል ሳይሆን መስጠት በጣም ያስደስታል:: ሰማያዊና ምድራዊም ዋጋ ያሰጣል:: ጌታችን መድሐኒታችን ኢየሱስ ክርስቶስ ሐዋርያትን አስተምሮ ወደ ዓለም ሲያሰማራችው “ሂዱና አስተምሩ” ያውም ያለምንም ክፍያ በነፃ እውቀትን አስተላልፉ (create awareness) ነው ያለው:: ህዝቡ ግንዛቤና መረጃ ካለው እራሱን በራሱ መርዳት ይችላል:: እናንተም የሐዋርያት ተምሳሌት ስለሆናችሁ ህዝባችሁንና ወግናችሁን ማስተማር ማንቃትና ማደራጀት ይጠበቅባችኃል:: ሀገርና ወገን የምታከብሩ ችግሩ ችግሬ ብሶቱ ብስቴ ነው የምትሉ ከሆነ በወሬ ሳይሆን በተግባር ማሳየት አለባችሁ:: ለነገሩ ምሁራን ስንል ክፍል አንድ ላይ እንደገለፅኩት ወጥታችሁ ወርዳችሁ “ጥረህ ግረህ በግንባርህ ወዝ ብላ” የሚለውን የእግዚአብሔርን ትእዛዝ ተከትላችሁ በጥረታችው ለከፍተኛ እውቀትና ማዕረግ የበቃችሁትን ሲሆን ጥቂት የማይባሉ በፎርጅድና የሌሎችን የመመረቂያ ፅሑፍ እየሰረቁ በገንዘብ እየገዙ የሐሰት ከፍተኛ ትምህርት አለን በማለት በእውቀታቸው ሳይሆን በፖለቲካ አመለካከታቸው ሥልጣን ላይ ቁብ ብልው ሀገር የሚያተረማምሱና የገዛ ህዝባችውን ከጨቋኛች ጎራ ተሰልፈው የሚያሰቃዩትን ሐሰተኞች ምሁራንና ላሉበት ወይም ለነበሩበት ሥልጣን ድጎማ “የክብር ዲግሪ” የሚጭኑትን ግለስቦችን አይጨምርም::

አሁን የምንገኝበት ዘመን ወጣት ምሁራን እንደ እንጉዳይ የፈሉበት አብዛኛዎቻችሁ ወጣት ምሁራን ናችሁ:: እውቀቱም አቅምና ጉልበቱም ሀብቱም በመጡኑም ቢሆን አላችሁ:: ከሌላው ወገናችሁ የተሻለ የኑሮ ደረጃ ላይ ናችሁ ሀገር ቤት የምትኖሩ ማለቴ ነው:: ውጭ ሀገር የምትኖሩት ሀገር ቤት ካሉት ምሁራን ጋር ኑሮአችሁ ሲነፃፀር የሰማይና የምድር ያህል ይራራቃል:: ሁላችሁም ግን የሚጎላችሁ አንድ ነገር አለ:: እርሱም ብዙዎቻችሁ የሀገርም ሆነ የወገን ጉዳይ ሲጨንቃችሁ አይታይም:: ግድም የላችሁም; ስለማንነታችሁም ሆነ ስለታሪካችሁ ለማወቅ አትፈልጉም ስትፈልጉም አንታይም:: ያለፉት አያት ቅድመ አያቶቻችሁ ለሀገርና ለወገን የከፈሉት መስዋዕት እኛ ዘንድ ዋጋ አልተሰጠውም: ብዙዎቻችን ፊታችንን ተወልደን ወደ አደግንበት አካባቢ ሆነ ማህበረሰብ ላለመመልስ የማልን አንታጣም:: ከራሳችን ማንነትና ባህል ይልቅ የፈረንጁን(የውጭውን) አለባበስም ሆነ አመጋገብ በአጠቃላይ የኑሮ ዘዴ ለመከተል ስንሞክር የራሳችንን አኩሪ ታሪክ ወግና ባህል እሴቱን ጭምር አሽቀንጥረን በመጣል ህልውናችንን ጭምር የረሳን ብዙ ነን:; ምንም ለመምስልና ለማስመሰል (identity crises) ብንሞክር እውነታው ግን እኛ ከእኛ ውጭ ሌላውን መሆን አንችልም:: ዘር ከልጏም ይስባል :: ራስን መካድና በራስ አለመተማመን መድሐኒት የማይገኝለት በሽታ ስለሆን መድሐኒቱ ምንም ይሁን ምን ወደ ራስ ማንነት መመለስና በራስ መተማመን ነው (self confidence and identity):: ከማንም የተሻለ አኩሪ ታሪክ አለን:: ምንም እንኳን እንደ ሌላው ማህበረሰብ በአደባባይ ወጥቶ ስለማንነታችን የሚናገርልን ባይኖርም ምሁራንም ዝምታን መርጣችሁ እንደ የዋህዋ እንስሳ የተጫናችሁ የግፍ አገዛዝ እየከበዳችሁም ቢሆን መገዛትን ስለመረጣችሁ:: አስተዳድሩም ተብላችሁ ሥልጣን ተቀንጭቦ የተሰጣችሁ ደግሞ ለህዝብ ከመወገን ይልቅ የውሎ አበልና የሥልጣን ጥም ስለያዛችሁ ተነስ! እሺ:: ተቀመጥ! እሺ:: እጅ አውጣ! እሺ ሁሉን እሺ እንጂ ለምን ብላችሁ የማትጠይቁ ብዙዎች ናችሁ:: ጥቂቶች መስዋዕት ሊከፍሉ ቢሞክሩም የብዙሀኑ ካድሬዎችና አድርባዮች ዱላ ያርፍባችዋል:: ታዲያ ምን ይሻለናል እኛም ሆን ህዝባችን ብዙ ምሁራን እያሉን ቆራጥና ደፋር አመራር በማጣታችን ተጠላልፈን በሙውደቅ ለበይዎች ሲሳይ በመሆን ለእጥፍ ድርብ አፈናና ጭቆና እራሳችንንም ህዝቡንም እየዳረግነው ነው:: ነፃ ለመውጣትና የራስን እድል በራስ ለመውሰን ክልል መሆን ግድ ይላል:: ደህዴን ግን ህገመንግሥቱን ንዶ ለበልጠ ጭቆና እየተዘጋጀ መሆኑ እየተስማ ነው:: በሰላማዊ መንገድ የህዝባችንን ህይወትና ንብረት በማይጎዳ መልኩ ቀፎው እንደተነካ ንብ በህብረት ወጥተን ጭቆናው እንዳንግፈገፈን በሰላማዊ መንገድ ተቃውሞ ማስማት ግድ ይላል:: ለዚህም በሀገር ውስጥም ሆነ በውጭ ሀገራት የምኖሩ ምሁራንና ባለሀብቶች በሳል እመራርና ድጋፍ ያስፈልጋል::

ሀገር የነበርን ክልል መሆን አይበዛብንምና ጥያቄው በህገ መንግሥቱ ይመለስ

ፋንታዬ መኮ
ነሐሴ 15 ቀን 2011 ዓም
21 August 2019
ክፍል ሶስት ይቀጥላል:: ቸር ይግጠመን
ካፋ ሚድያ kaffamedia

Leave a comment

ክፍል ሦስት:- ለባለሀብቶች


ክፍል ሦስት

ለባለሀብቶች

ውድ የሀግሬ ወጣት ምሁራን ባለፉት ሁለት ትከታታይ ክፍሎች አንብባችሁ ለሰጣችሁኝ አስተያየትና ለጏደኞቻችሁ (share) ስላደረጋችሁ ዓላማየ መረጃ በመለዋወጥ ድርሻችን እንድንወጣ የሚል ስለሆነ ሦስተኛውን ክፍል እንድቀጥል ረድቶኛል:; አመሰግናለሁ::

በክፍል አንድ ለምሁራን ሰላምታ ባለሀብቶችንም ጨምሬ በያላችሁበት ሰላም እንድትሆኑ ተመኝቼ ክፍል ሁለት ላይ ትኩረትና ጫና ያድረግኩት ምሁራን ላይ ነበር አሁን ደግሞ ወደ ባለሀብቶች ጎራ ዘው ልበል:: ለምን እናንተንም ሰፊው የካፋ ወይም የድቡብ ምዕራብ ኢትዮጵያ ማህበረስብ በናፍቆት ስለሚጠብቃችሁ::የሀገር ልማትና ብልፅግና የህብረትስቡ እድገትና ከድህነት መላቀቅ የምሁራንና የባለሀብት ጥምረት አንዱ ያለ ሌላው ቅንጅት የታሰበውን ውጤት በአጭር ጊዜ ውስጥ እውን ማድረ ስለማይታሰብ:::

ውድ ባለሀብቶች

እዚህ ላይ ባለሀብቱ ማነው? ማህበረስቡ መሆን ሲገባው ነገሩ የተገላቢጦሽ ሆነና ጥቂት ቆሎ ይዘህ ወደ አሻሮ ተጠጋ እንዲሉ ጥቂት ሀብት ይዘው በልምላሜው ወደር የማይግኝለትን የካፋን ወይም የደቡብ ምዕራብ ኢትዮጵያ አካባቢን ጥቂት የማይባሉ ግለሰቦችና ቡድኖች በልማት ስም ወረው በጥቂት ዓመት ውስጥ ብዙዎች ሲከብሩ ህዝቡ ግን እንደ ግመል ሽንት በኑሮው የኃሊት በመሄድ ያለምንም እድገትና የኑሮ ለውጥ አመታትን አስቆጥሯል እያስቆጠረም ይገኛል:: ሆኖም ማህበርሰቡ ከዛሬ ነገ ባለሀብቶች ወደ አካባቢው ሲገቡ ሰንቀው የመጡትን የእድገት ራዕይ ይተግብራሉ ብሎ በተስፋ ሲጠብቅ ይባስ ብለው ሀብትና ንብረቱን ብቻ ሳይሆን ጉልበቱን ጭምር ያለአግባብ በመበዝበዝ ኢፍትሀዊ ተግባር ቢፈፅሙበትም በሰላምና በትዕግሥት እነሱ ለልጅ ልጅ የሚተርፍ ሀብት ሲያከማቹ እርሱና ልጆቹ ግን የበይ ተመልካች በመሆን በእድገት ጎዳና መጏዝ ስላልቻሉ “ኃላቀር” የሚል ታፔላ ተለጥፎባቸው ከሌሎች የኢትዮጵያ አካባቢዎች በታች መሆናቸው የአደባባይ ምሥጢር ሆኖ ቆይቷል ::የአካብቢው ሀብትና ንብረት ግን ያለምንም ቁጥጥር እየተጋዘ ወደ መሀል ሀገርና ሌሎች አካባቢዎችን በማልማት ላይ ይገኛል:: የጠላት ገንዘብ ይመስል ደን ይጨፈጨፋል (ይወድማል) በምትኩ ግን አይተከልም:: ፋብሪካ ሲያቋቁሙም አይታይም::

ሁለተኛ ሀገር በቀል ባለሀብቶችም አንድም ነገር አካባቢያቸው ላይ ሳይገነቡ የተለያዩ መሠረታዊ ግንባታዎች የጤና ተቋም ትምህርት ቤት ንፁህ የመጠጥ ውሀ ቀበሌን ከቀበሌ የሚያገናኝ መንገድ የሥራ እድል እንደየችሎታቸውና ለወጣቶችም አቅማቸው በፈቀደ ሠርተው እንዲለወጡ በመጠኑም ቢሆን የህዝቡን የኑሮ ደርጃ በሂደት መቀየር ሲገባቸው የአካባቢውን ሀብት ካጋበሱ በኃላ መሀል ሀገርና ሌሎች አካባቢዎች ላይ ፋብሪካዎች ሆስፒታሎች ሆቴሎች የትምህርት ተቋማት የህዝብ ማመላለሻ አውቶብሶችን የጭነት መኪናዎችን የመጠጥ ውሃ የለስላሳና የቢራ መጠጥ የእደ ጥበብ ወዘተ ፋብሪካዎችን ከአካባቢው በዘረፉት ጥሬ ሀብት ሲገንቡ ይታያሉ:: አስዛኝና አስፋሪ ድርጊት:: ከውጭ የሚመጡትም የማህብረስቡን መሠረታዊ ፍላጎት በማሟላት ፋንታ ሀብት ለማካበት ሲሽቀዳደሙና እቅድ አውጥተው የየራሳቸውን ሰዎች ጭምር ሳይቀር አሰማርተው ነዋሪውን ያለምንም ክፍያ ከቤት ንብረቱ አፈናቅለው አያት ቅድመ አያቶቹ ተንከባክበው ያቆዩትን የደን ሀብት አውድመው የአንበሳውን ድርሻ ሲውስዱ ህዝቡን የበይ ተመልካች አድገውታል::

ሶስተኛ ከነዚህ ባለሀብቶች ውጭ ህብረተሰቡ ማንነታቸው ባልታወቀ የንብረት ባለቤቶች ለምሳሌ በጊንቦ ወረዳ ውስጥ የውሽውሽ ሻይ ልማትን ብንወስድ አባቶቻችን ለዘመናት ተንከባክብውና ጠብቀው ያቆዩት ደን ተጨፍጭፎ ሻይ ከተተከለ በኅላ ለዘመናት ሲመዘበር ቆይቶ ዛሬ ላይ ባለቤት አልባ ቢመስልም በባለቤትነት በውል የታወቀ ግለሰብም ሆን ቡድን ይፋ ወጥቶ ሲነገር ባይሰማም ሸህ አላሙዲን መለስ ዜናዊ አዜብ መስፍንና አሁን ላይ ደግሞ ጌታቸው አሰፋ በባለቤትነት ሲታሙ ይሰማል:: ጥያቄውን ለጊንቦ ወረዳ አስተዳዳሪዎች መልስ እንዲሰጡ ህዝቡ ይጠይቃል (የውሽውሽ ሻይ ልማት የማን ነው? የህዝቡ? የካፋ አስተዳደር ባለሥልጣናት? የፌደራል መንግሥት? የዴህዴን? ወይስ የቻይና? እኮ የማን???:: የህዝቡን ጉልበት ላለፉት 27 አመታት በሠራተኛ ስም በባርነት ሲገዙት የልማቱ ባለቤት ማንነት አለመታወቁ ተጠያቂ መጥፋቱ ያልተፈታ እንቆቅልሽ::

ለዘመናት የተመዝበረው የአካባቢው ማህበረሰብ ሀብት ገንዘቡ የት ገባ? ጥሬው የሻይ ቅጠል ወደ ፍጆታ የሚለውጠውና አሽጎ ለገበያ የሚያቀርብው ፋብሪካ የት ነው የተቋቋመው? ባለቤቱስ ማን ነው?? የምታውቁ አትጠፉምና የምዝቡራው አካል ካልሆናችሁ:: ይገርማል:: መንግሥት አልባ የሆነ በቁሙ ከነነፍሱ የተሸጠ ህዝብ የሚኖርበት እካባቢ:: እናውቃለን ብንናገር እናልቃልን:: ለዚህም ነው ምዝበራው ያንገሸገሸው የካፋ ህዝብ የክልል ጥያቄ አንስቶ ሰሚ ባያገኝም እንኳን (አባቱ ዳኛ ልጁ ቀማኛ) እየሆነበት ለዘመናት በሰላማዊ መንገድ ድምፁን በማሰማት ላይ የሚገኘው:: ጥያቄውን መመለስ አግባብነት እንዳለበት እየታወቀ የባለሀብቶችና የአንዳንድ የግል ጥቅም አሳዳጅ ባለሥልጣናት ተፅእኖ መፍትሄ ከመፈለግ ይልቅ ጉዳዩን ውስብስብ ሲያደርገው ይስተዋላል::

ታዲያ እውነታው ይሄ ከሆነ ባለሀብቶችንና የህዝብ አደራ የተጣለባችችሁ ባለሥልጣናት ያለፈው አለፈ:: ላለፈ ክረምት ቤት አይሰራም:: የአከባቢው ማህበረሰብ በእድገት ኃላ ቀርነት ወደዳችሁም ጠልችሁም ከናንተ ራስ እይወርድም:: ታሪክም ሥራችሁን መዝግቦ ለትውልድና ለልጅ ልጆችችሁ ማስተላለፍ ግድ ነው:: ነገር ግን ይህን የበደላችሁትን የዋህ ህዝብ የምትክሱበትና አሳፋሪውን ታሪክ ከስህተታችሁ ራሳችሁ ተምራችሁ አዲስና እኩሪ ታሪክ የምታስመዘግቡበት የተሐድሶ ወቅት ላይ ስለምትገኙ ይህን አጋጣሚ ተጠቅማችሁ ሁኔታዎችን በማገናዘብ ከህዝብ ጎን በመቆም:

1ኛ/ የክልል ጥያቄው ህገ መንግሥቱን ተከትሎ በአግባቡ በአስቸኳይ እንዲመለስ ጫና ማድረግ (ተሰሚነት ስላላችሁ የህዝቡን ድምፅ በሰልማዊ መንገድ አስተጋብት)
2ኛ/ ለዘመናት ሀብትና ጉልበቱን የመዘበራችሁትን ማህበረሰብ አስፈላጊውን መሠረተ ልማት መዋቅር ተባብራችሁ በመዘርጋት ሌሎች መሰሎቹ የደረሱበት የእድገት ደረጃ ላይ እንዲደርስ ማድረግ
3ኛ/ ሀብትና ንብረቱ ላይ የመወሰን (እናንተም ህዝቡም) ተጠቃሚ የሚሆንቡትን መንገድ ማመቻቸት

4ኛ/ የለውጡ አጋር በመሆን ወደፊት በምገነባው ዲሞክራሲያዊት ኢትዮጵያ ውስጥ ተሳታፊ እንዲሆን ከደቡብ ምዕራብ ኢትዮጵያ ህዝብ ህብረት ጎን በመቆም (በመተባበር) አስፈላጊውን አስተዋፅኦ በማድርግ የፋይናንስ ድጋፍና የማስተማር የማንቃትና ማደራጀት ወዘተ ድጋፍ ይጠበቅባችኃል

አንዳንዴ ከቀለም ትምህርትና ከሀብት ወጣ ብሎ እድማስን አስፍቶ አካባቢን አጥንቶ ለህብረተሰቡ የሚበጅ መልካም ነገር ማድረግ ከምሁራንና ከባለሀብት ይጠበቅባችኃል::እንደምታውቁት አካባቢው አመቱን ሙሉ በልምላሜ የታደለና የሀገር ውስጥም ሆነ ከሀገር ውጭ ለሚመጡ የሀገር ጎብኝዎች ቀልብ የሚስብ የድን ሀብትና የተለያዩ የቅመማ ቅመም የአእዋፍ የእንስሳት ዝርያዎች ማእድናት ማር ወንዞችና ፏፏቴዎች ፍልውሀዎች ወዘተ እያለው ነገር እሱ በሀብትና ንብረቱ ተጠቃሚ ሳይሆን ዘመናዊ የገባር ሥርዓት ተጭኖበት ላለፉት ምዕተ አመታት ሲበዘበዝ ሲጨቆን ኖሯል:: አሁን ግን ይብቃኝ እያለ ስለሆነ ልንተባበረው ግድ ይላል:: ይህ ካልሆነ ግን ከዝምተኛና ከረጋ ውሀ ተጠንቀቅ እንዲሉ የካፋን ህዝብ ጀግነትና ቆራጥነት ለማወቅ የተለያዩ የታሪክ ምሁራን የዘገቡትን ታሪኩን አለመረዳት ይሆናል:: ልብ ያለው ልብ ይበል ይሏል::

አንድነት ህይል ነው ትዕግሥት የአስተዋይነት ምልክት እንጂ የፍርሐት አይደለም:: ሰላምና ፍቅር ካለን ከራስችን አልፈን ለሌሎች እንተርፋሉን:::ኢትዮጵያ ሀገራችንንም የበለጠ ተጠቃሚ እናድርጋለን::

በተመሳሳይ እርእስ እስክንገናኝ ቸር ይግጠመን::

ፋንታዬ መኮ
ነሐሴ 23 ቀን 2011 ዓም
29 August 2019
ካፋ ሚድያ kaffamedia

Leave a comment

ለካፋ ሕዝብ በሙሉ


ለካፋ ሕዝብ በሙሉ

እንደሚታወቀው ላለፋት 27 አመታት በደኢህዴን የተሳሳተ አካሄድና አግላይ ውሳኔ በማይመጥነው ክልል በመታቀፉ በብዙ የልማት እንቅስቃሴዎች የተጎዳው የካፋ ህዝብ ከዝህ ኮሮጆ ለመውጣት ስንቀሳቀስ ቆይቷል ።እንቅስቃሴውም የተጀመረው አንዳንዶቹ እንደሚሉት አሁን ደኢህዴን መውደቁን ተከትሎ ሳይሆን ገና በጧቱ በህወኃቱ ቢተው በላይ ምዲረ-ደቡብ ትጠርነፍ የምል ፋሽስታዊ ውሳኔ በተወሰነበት ወቅት ነበር። በተለይ በአባታችን በፍታውራር ዘውዴ ኦተሮ መሪነት የተቋቋመው የካፋ ህዝብ ደሞኪራስያዊ ኣንድነት(KPDU) በ1985 በመለስ ዜናዊ ይመራ ለነበረው ለሽግግሩ መንግስት በጻፋት ደብዳቤ ካፋ በአፍሪካ የራሷ የሆነ መንግስታዊ መዋቅር የነበራት ሉአላዊ ሀገር መሆኗን ጠቅሶ ከርቀት ፣ከፖለቲካዊ ተሳትፎና ተያያዥ ጉዳዮች ጋር በማያያዝ ካፋ ከደቡብ ክልል ጋር መጨፍለቅ ተገቢ አይደለም ፤በመሆኑም ራስ ገዝ ትሁን ብሎ ነበር።ከዝህ ጊዜ ጀምሮ የካፋ ህዝብ እኩል የመልማትና ራስን በራስ የማስተዳደር ህገ -መንግስታዊ መብት እንዲጠበቅለት ካስፈለገ አሁን ደኢህዴን እያደረገ ካለው በካፋ ጉዳይ ሌሎች ከሚወስኑበት ሁኔታ ወጥተን በራሳችን ጉዳይ ራሳችን የምንወስንበት ካፋ ብሄራዊ የክልላዊ መንግስት ማቋቋም እንደምያስፈልግ በተደጋጋሚ ሲነሳ ቆይቷል ።በይበልጥ ደግሞ በ1986 የካፋ ቋንቋ ስምፖዝዬም ስካሄድ እና በ1998 የካፋ ፎረም ስመሰረት ተነስቶ ደኢህዴን ከህገ መንግሥት ውጭ ጫና በማዲረግ በእስር እና ወከባ በማፈኑ ሳይፈጸም ቆይቷል ።

ይህ ሁሉ እንዳለ ሆኖ የዘንዲሮ ይለያል ፤ከተላላኪነት ባለፈ በሀገሪቱ ፖለቲካ ውስጥ ያን ያህል ቦታ ያልነበረው ደኢህዴን መውደቅን ተከትሎ የህዝቡ የክልል እንሁን ጥያቄ የህገ መንግስቱን የመጀመሪያ መስፈርት አሟልቶ ክልል ምክር ቤት ድርሷል ።ህጋዊው የካፋ ህዝብ ተወካይ የዞኑ ም/ቤት የካፋ ህዝብ የክልል እንሁን ጥያቄ በሙሉ ድምጽ አጽድቌል ።በመሆኑም ክልል ም/ቤቱ በአስቸኳይ ለምርጫ ቦርድ እንዲጻፍ ካፋን ወክሎ ምክር ቤት ያላችሁ ሚናችሁን ሊትወጡ ይገባል ።ካልሆነ ግን የሁልጊዜ ይቅርታ ፣ንስሃ የለም ።ህዝብ እየከሳ ራስን ማወፈር ፣ህዝብን እያደሄዩ ሀብታም መሆን መቼም ተገቢ አይሆንም ።ስለሆነም እድሉ ቢጠቢም ካፋ ህዝብ የጠየቀው ክልል የመሆን ጥያቄ ከግለሰብ የስልጣን ጥያቄ የሚበልጥ እና የትውልድ ጥያቄ ነው።ስለዝህ እየወደቀ ካለው ደኢህዴን ወጣ ብላችሁ ዘላለማዊውን የካፋ ህዝብ ትግል ተቀላቀሉ ።

የተወደዳችሁ የጉርማሾ ኮሚቴ አባለትና የደቡብ ምእራብ ኢትዮጵያ ህዝብ በህብረት(ደምኢሕህ)አመራር አካላት፦በአሁን ሰዓት የካፋ ህዝብ እየተመኘው ያለው ክልል የመሆን ጥያቄ በአንድም በሌላ ስትጠይቁት የነበረው ጥያቄ በመሆኑ መከፈል ያለበትን መስዋእትነት በመክፈል ለተግባራዊነቱ ዘብ እንዲቆሙ ጥሪዬን አቅርባለሁ።
የተከበራችሁ የካፋ ህዝቦች እንደ ህዝብ ከቆምን እና በእራሳችን ሉአላዊ ሀገርነት ከቆምን ዘመናት ተቆጥሯል ።ብዙዎች እንደ ህዝብ ዓለም ሳያውቃቸው እኛ ግን እንደ መንግስት የታወቅን ፣የራሳችን ባንዲራ የነበረን ሚክራቾ በመባል የሚታወቀው የመንግስት ሰርዐት ያቋቋምን ህዝቦች ነን።ደኢህዴን ዛሬ የምለማመዳትን ፖለቲካ አያቶቻችን ከዛሬ 150 ዓመታት በፍት የካፋ የፖለቲካ ጠበብት በዛ ጨለማ ዘመን በብቃት ተወጥቷል ።ስለሆነም በደኢህዴን ካፋ ይመራ ዘንድ አይመጥነንም ።ስልሆነም ደኢህዴን ያወፈራቸውን ግሌሰቦችን በመተው ወደ ህዝባችን በመመለስ ታርካዊ ክብራችንን እናስመልስ ።በመሆኑም የካፋ ህዝብ የክልል ጥያቄ በተጠየቀበት ህገ መንግስታዊ መንገድ እንዲመለስ ህገ መንግስታዊ ትግል በማካሄድ ካፋ ክልላዊ መንግስት እንዲቋቋም በያለንበት የድርሻችንን እንወጣ።
Injustice anywhere is a threat for justice everywhere!
መልካሙ ሸገቶ
ቦንጋ

%d bloggers like this: