Leave a comment

ማሳሰቢያ ከደቡብ ምዕራብ ኢትዮጵያ ህዝብ ሕብረት


ማሳሰቢያ ከደቡብ ምዕራብ ኢትዮጵያ ህዝብ ሕብረት
ለደቡብ ምዕራብ ኢትዮጵያ ህዝብ እና ለቦንጋ ዩንቨርስቲ ማህበረሰብ በሙሉ ፦ ሠሞኑን ከተለያዩ የመረጃ ምንጮች መረዳት እንደተቻለው በቅርቡ የመማር ማስተማር ሥራውን የጀመረው የቦንጋ ዩንቨርስቲ ውስጥ በመማር ላይ የሚገኙ ተማሪዎች ያስነሱዋቸው የመብት ጥያቄዎችን ተከትሎ አመፅና ብጥብጥ መፈጠሩ ይታወሳል።
በመሆኑም የመብት ጥያቄውን ተከትሎ የተነሳውን ብጥብጥ የኦሮሞ ተማሪዎች ብቻ ሆን ብለው አመፅ ለመፍጠር ተነሳስተው እንዳደረጉት በመቁጠር የሃሰት ፕሮፖጋንዳ በወያኔ ካድሬወችና በተለያዩ ደጋፊ አካላት እየተነዛ ይገኛል።
ወያኔ አሁንም ራሱን አዋቅና ብልጥ አደርጎ እየቆጠረ ያለ ይመስለዋል። በጣም የወረደና የዘቀጠ አስተሳሰብ ይዞ ብሄርን ከብሄር ሊያጋጭ ይፈልጋል። የምገርመው የካፋ ሕዝብ ወይም የደቡብ ምዕራብ ኢትዮጵያ ህዝብም ሆነ የቦንጋ ዩንቨርስቲ ማህበረሰብ እንደዚህ ዓይነት ተራና መሰረተብስ የወያኔ ካድሬዎችን ወሬ የምሰማበት ጊዜ ላይ አይደሉም። እንደዚህ ዓይነቱ የሃሰት ፕሮፖጋንዳ የተከበረውን የኦሮሞንና የካፋን ህዝብ ለማጋጨት እና ተማሪዎች መብታቸውን ለማስከበር የሚያደርጉትን ትግል ለማኮላሸትና ለማቀጨጭ ሆን ተብሎ የተጠነሰሰ ሴራ መሆኑን ሁሉም ሊረዳው ይገባል። የካፋና የኦሮሞ ሕዝብ ድሮ የነበረ፥ አሁን አብሮ የሚኖርና ለወደፊትም አብሮ የሚኖር ሕዝብ ነው። ይልቁንም የትግሉ አካል መሆን እየተቻለ ችግሩን የአንድ ወገን ብቻ ማድረጉ ተገቢ አለመሆኑን መላው የደቡብ ምዕራብ ኢትዮጵያና የቦንጋ ዩንቨርስቲ ማህበረሰብ በጥልቀት በመገንዘብ እንደዚህ ዓይነቱንና ተዛማጅ የመብት ጥያቄዎች ከሚያነሱ ታጋዮች ጎን እንዲሠለፍ በተለይም ከቄሮና ከፋኖ ጋር እጅ ለእጅ ተያይዦ ይህንን መንግሥት ነኝ ባይ ዘራፊን እንድናስወግድ ጥሪያችንን እናቀርባለን።

http://kaffamedia.com

Posted by: Kumilachew Gebremeskel Ambo

Advertisements
Leave a comment

የካፋ ልጅ ቡና


የካፋ ልጅ ቡና

ኮፊ ካፋ ብለህ አስጠራልኝ ስሜን

እባክህ ተረዳልኝ እወቅልኝ ድካሜን

በሆዴ አዝየ ብቅ ስትልልኝ ኮትኩቼና አርሜ

ለዓመታት ጠብቄ ብቅ ስል አበባህ

በጉጉት ስጠብቅ እንድለወጥ መልክህ

ደስታዬ ወሰን አጣ ቀይ ሆንክ ጎመራህ

እያንዳንዱን ቀዩን ለቅሜ አስለቅሜ

ጎንበስ ቀና ብዬ በደካማው አቅሜ

በጧት ተነስቼ አፍልቼ ጠጥቼ

ቸር አውለኝ ብዬ ለአምላኬ አመልክቼ

ተራራውን ይዤ ገበያ ወጥቼ

እመላለሳለሁኝ ዘይትና ላምባ ሽንኩርት ገዝቼ

እንዲህ እንዲህ እያልኩ አለፉ ዓመታት

አንድ ቀን ሳይደላኝ እንዲያው ስቃትት

አንተ የኔ ቡና በጎጀብ አድርገህ ጊቤን ተሻግረህ

ክፍለ ሀገሮችን ሁሉንም አዳርሰህ አፍርካን ዞረህ

ዓለምን በሙሉ በፍቅርህ ሱስ አስረህ

መኖር ጀምረሀል በጫካው በሜዳው በየጓሮ ቦቅ

ተብለህ ተጠርተሃል  አረንጓደው ወርቅ

ከእኔ ተለይተህ ሄደሃል እሩቅ

ያንተ ዝና ቢገንም ከአጥናፍ አጥናፍ

ህዝቤ አልተጠቀመም አላገኘም ትርፍ

ደፋ ቀና ብሎ የለፋው ገበሬ

ተጠቃሚ አልሆነም ከአረንጓደው ፍሬ

በጣም የሚደንቀው የሚገርመው ነገር

በጓሮዋ የሌላት አንድ የቡና እግር

ብቅ አለች ኤርትራ ከኤክስፖርተሩ መንደር

ቡና ቡና እያሉ ዘፍነው አዘፍነው

ልጄን አስኮበለሉት ባህሩን አሻግረው

አሁን አሁንማ እንደሚንሰማው በየሚዲያው

አፍርካ እስያ ላቲን አሜሪካ

ሀገራቸው ከፍተው የቡና ፋብሪካ

ኮፊ ካፌ እያሉ ቅጽል ስም ሰጥተው

ረሳ ማንነቱን ዜግነቱን ሸጠ

ድሃ እናቱን ረስቶ ስሙንም ለወጠ

ኧረተው አንተ ቡና የማንኪራ ፍሬ

ስደተኛ አትሁን ኮብልለህ ከምድሬ

ከባህር ወዲህ ማዶ እዚሁ ሀገሬ

አንድ አንድ ጎረቤቶች የሚነዙት ወሬ

ሆዴን አቆሰለው ሆንኩኝ ተናዳጅ

አንተን አደረጉህ የእኔ እንጀራ ልጅ

ቀምተው ለመውስድ ዝና ከማንኪራ

የኔ የወላጅህ ስሜ እንዳይጠራ

የአንተን ከማንኪራ መወለድ ዘንግተው

ሲሯሯጥ አያለሁ ቡና የኛ ነው ብለው

ከካፋ በስተቀር ሀገር ከተማ ሌሎችም ጭምር

ሆኑ ተጠቃሚ ከአንተ በተገኘው ዶላርና ብር

እናትህ ወላጅህ ደፋ ቀና ብዬ

አልተስተካከልም አሁንም ኑሮዬ

ሆድ ሲያውቅ ዶሮ ማታ ሆነና ነገሩ

ታሪክ ቢከላለስ ቢደበቅ ምስጢሩ

ማንኪራ ካፋ ነው የቡና መንደሩ

እናንተ የካፊ ቡሾ ማህደር አገላብጡ

ታሪክ መርምራችሁ እውነቱን ግለጡ

ቀና ቀና በሉ ሁላችሁም ኩሩ

ዓለም ያውቃችኋል ማንነታችሁን እናንተ ባታወሩ።

ከፋንታዬ መኮ

 

Leave a comment

ያንን ቄሮ ያንን ፋኖ


ያንን ቄሮ ያንን ፋኖ

በርታ በሉት ያንን ቄሮ ያንን ፋኖ ጀግና

አይዞህ በሉት ከዚህ በላይ ምን አለና

ብሶት የወለደው

ደም ያንገፈገፈው

የጀግኖች ቃል ጥሪው

ወኔ የቀሠቀሠው

እነ ቄሮ አባ ፋኖው

የአያት ቅድመ አያት ቃል ኪዳን አደራ

ሰምቶ እንዳልሰማ ያልሆነ እናት ስትጣራ

የንጹሀን ደም መላሽ

ጠላት ገዳይ ጠላት ደምሳሽ

በርታ በሉት ያንን ቄሮ ያንን ፋኖ ጀግና

አይዞህ በሉት ከዚህ በላይ ምን አለና

የወገን አለኝታ ቀድሞ ደራሽ

የጭቁንን እንባ በደም አባሽ

ታሪክህ ተፅፏል በወርቅ ቀለም

ከትውልድ ወደ ትውልድ ይዘከራል ለዘላለም

በርታ በሉት ያንን ቄሮ ያንን ፋኖ ጀግና

አይዞህ በሉት ከዚህ በላይ ምን አለና

ቀስቅሳቸው ደቡቦችን ተጣራቸው የጋንቤላ መሰሎችን

የሶማሌ የአፋሩን ጭቁኖችን

የቤንሻንጉል ቆራጦችን

አሰልፈህ ከፍት ኋላ

የትግሉ ውል በጠላት እንዳይላላ

የነብርን ጅራት አይዙትም

ከያዙትም አይለቁትም

በርታ በሉት ያንን ቄሮ ያንን ፋኖ ጀግና

አይዞህ በሉት ከዚህ በላይ ምን አለና።

 

ከእውነቱ ቢወጣ

Leave a comment

ልብ በይ አፍሪካ


ልብ በይ አፍሪካ

አፍሪካ ቀና በይ ንቂ ከእንቅልፍሽ

ራስሽን ቻይ መሰደድ ይብቃሽ

ሀብት ሞልቶ ተትረፍርፎ በአህጉርሽ

ብዙ ማዕድናት አምቀሽ ይዘሽ

ወርቁ አልማዙ ብሩ ታምቆ ሆድሽ

ዛፍና ቅጠሉ ቡናው ፍራፍረው ሞልቶ ከጓሮሽ

ታዲያ ምን ጎሎሽ ነው ስደት ያማረሽ

የቆጥ አውርድ ብላ ጥላ የብብትዋን

የሰው ስታሳድድ አስቀምጣ የራስዋን

ዓለም ላይ በተነች ውድ ልጆቹዋን

ያልተነካ እምቅ ሀብት ይዛ በጉያዋ

ለልጆችዋ ጥቅም ባለማዋልዋ

እየኮበለሉ ልጆችዋ ይወጣሉ

በስተመጨረሻ ውዳቂ ተባሉ

አፍሪካ አመቻች ኑሮ ለልጆችሽ

ልጆችሽን ማሳደድ መናቆሩን ትተሽ

ሀገራቸው ገብተው እንድያገለግሉሽ

ባለ ብዙ ባህል ባለብዙ እሴት ያች ታላቅ አህጉር

ምንድነው ምክንያቱ የአፍሪካ መደፈር

ምን ይል ይሆን ማንዴላ ያ ታላቁ መሪ

ይቅርታን የቸረ ለአፓርታይድ ወራሪ

ክብራችን ሲነካ በአለም በአደባባይ

እናንተ አፍሪካዊያን አይቆጫችሁም ወይ

በአድዋ በማይጨው ድል ያስመዘገበች

ለነጭ ቅኝ አገዛዝ ያልተንበረከከች

አንዷ የአፍርካ ሀገር ኢትዮጵያ ነች

ሌሎቹም ቢሆኑ የአፍርካ መንግስታት

ከቶ አልተበገሩም ለወራሪ ጠላት

ሁሉንም ጠራርገው በውርደት ሸኙት

ታፍራና ተከብራ የኖረች አህጉር

ታላቅ ነች አፍርካ ከቶ የማትበገር

የቅኝ ገዢዎች ሽንፈትን ተላብሰው ከሀገር ስለወጡ

የልጅ ልጆቻቸው ይኸውና ዛሬ ልበቀሉን መጡ

ውዳቂዎች ሊሉን በጠራራ ፀሀይ አደባባይ ወጡ

እባክሽ አፍርካ ከእንቅልፍሽ ንቂ

ወዳጅ ጠላትሽን ጥንቅቀሽ እወቂ

ሰብስቢ ልጆችሽን አስገቢ አህጉርሽ

ደሃ እኮ አይደለሸም በጣም ሀብታም ነሽ

ብለው እየጠሩሽ ዳርክ ኮንቲኔንት (Dark Continent)

ግን ይሯሯጣል ሀብትሽን በመዝረፍ ለመቀራመት

የሥልጣኔ አምድ የሰው ዘር መገኛ

ናት እኮ አፍርካ ከአለም አንደኛ

ሀሰትም እንደሆን ታርክ ይፍረደኛ።

ፋንታዬ መኮ

Leave a comment

መግለጫ በወልዲያ እና በሌሎች አካባቢዎች


ሰሞኑን በጥምቀት በዓል አከባበር እና በተከታታይ ቀናት በወልዲያ እና በሌሎች አካባቢዎች በመንግስት ታጣቂ ኃይሎች በተወሰደ ህገወጥ ርምጃ ምክንያት የሰላማዊ ዜጎች ህይወት መጥፋቱን አስመልክቶ ከደቡብ ምዕራብ ኢትዮጵያ ሕዝብ ሕብረት የተሰጠ መግለጫ

በየትኛውም ሀገር ሃይማኖታዊም ሆኑ ባህላዊ የአደባባይ በዓላት በሰላም ይጠናቀቁ ዘንድ መንግስት ተገቢውን ጥበቃ ሊያደርግላቸው እንደሚገባ ይታወቃል። በሀገራችን ኢትዮጵያ ደግሞ በርካታ በዓላትን ለዓመታት ሕዝብ ወደ አደባባይ በመትመም በሰላም እያከበረ ወደቤቱ ሲመለስ ኖሯል። በዓላትን ለማክበር ወደ አደባባይ የሚወጡ በመላው ኢትዮጵያ የሚገኙ ህዝቦች ለዘመናት በአምባገነን መንግስታት ይደርስባቸው የነበረውን በደል በየበዓላቱ ላይ በዜማ ሲገልፁ መቆየታቸውን ማንም የሚያውቀው እውነት ነው። ይልቁንም አንዳንዶቹ መንግስታትና ነገስታት ዜማዎቹን ጆሮ ጠቢዎቻቸውን በመላክ ህዝቡ ምን አለ? የሚለውን በማዳመጥ በከፊልም ቢሆን የአስተዳደር ዘይቤአቸውን ለማሻሻል ሲጠቀምበት ተስተውሏል።

ይሁን እንጂ በተለይ ህወሓት መራሹ መንግስት በዴሞክራሲና በእኩልነት ስም እየማለ የተቃውሞ ዜማዎችን እንኳ መታገስ አቅቶት በሀገራችን ሕዝቦች ላይ ሞት የሚያዘንብ የምፅዓት ደመና ሆኗል። በተለይም ካለፉት ጥቂት ዓመታት ወዲህ አገዛዙ ሕዝብ በተሰበሰበባቸው ባህላዊ እና ሃይማኖታዊ ክብረ በዓሎች ላይ የሕዝቡን ሰላም ሊጠብቁ በሚገባቸው ወታደሮቹ አማካይነት ጥይት በመተኮስ ለበርካቶች ህይወት መቀጠፍ፣ አካል መጉደልና ኑሮ መናጋት ምክንያት ሆኗል። ቀላል ምሳሌዎች ለማንሳት ያክል ከአምስት ዓመታት በፊት በአዲስ አበባ አንዋር መስጊድ እንዲሁም ከአንድ ዓመት በፊት በቢሾፍቱ ሆራ ሐይቅ አካባቢ የእምነት ሥርዓታቸው የሚፈቅደውን ለመፈፀም በወጡ ሰላማዊ ዜጎች ላይ የፈፀመውን ርምጃ ማስታወሱ በቂ ነው። ከዚህ ሁሉ በኋላ በቅርቡ አገዛዙ ባለፉት ጊዜያት ለፈፀምኳቸው ስህተቶች ተፀፅቻለሁና ይቅርታ እጠይቃለሁ፤ ሁሉንም የፖለቲካ እስረኞችንም እፈታለሁ፤ ባለ ማግስት በወልዲያ ዓመታዊውን የጥምቀት በዓል ለማክበር በወጡ ምዕመናን ላይ ተኩስ ከፍቶ የበርካቶችን ሕይወት በመቅጠፍ ወደለየለት አረመኔያዊ ተግባሩ ተመልሷል። ይህ ሁሉ የጭካኔ ርምጃ መላውን የኢትዮጵያ ህዝብ ያሳዘነ ብቻ ሳይሆን በቁጣ እንዲነሳሳ ምክንያት በመሆኑ ባሁኑ ወቅት በበርካታ የሀገሪቱ ክፍሎች ሕዝባዊ ተቃውሞው እንደገና በማገርሸት ላይ ይገኛል። ተቃውሞንም በኃይል ለማስቆም የሚደረግ ማንኛውም ርምጃ መንግስትን ተጠያቂ እንደሚያደርግ ከወዲሁ ሊገነዘብ ይገባል።

የደቡብ ምዕራብ ኢትዮጵያ ሕዝብ ሕብረት መንግስት በተከታታይ እየፈፀመ ባለው ህገወጥ ርምጃ ጉዳት ለደረሰባቸው ወገኖች በሙሉ የተሰማውን ጥልቅ ሀዘን እየገለፀና ሥርዓቱን ለማስወገድ በሚደረገው ትግል ከህዝቡ ጋር በአጋርነት እንደሚቆም እና የሚወክለውን ህዝብ ትግል በማስተባበር የበኩሉን ድርሻ እንደሚወጣ በድጋሚ ያረጋግጣል። የሚወዷቸውን በሞት ለተነጠቁ ወገኖችና ለመላው የኢትዮጵያ ሕዝብ መፅናናትን እየተመኘ በጀመረውም ትግል በስሙ ሥልጣን ይዘው ከሚነግዱ ጨካኝ ገዢዎች መዳፍ የሚላቀቅበት ቀን ሩቅ እንደማይሆን እርግጠኛ ነው።

እግዚአብሔር ሀገራችን ኢትዮጵያን ይባርክ!

Posted by: Kumilachew Gebremeskel Ambo

Leave a comment

የሀገር ኩራት


የሀገር ኩራት

ጦረኛ መጥቶብኝ የዛሬ መቶ ዓመት

ህዝቤን አሰልፌ ከፈለኩኝ መስዋዕት

ወገን ለመታደግ ለካፋ ነፃነት

ግን ምን ያደርጋል ጊዜ ጣለኝና

እጃቸው ገባሁኝ ታሰርኩ በካቴና

ተሸንፌ ሳይሆን በሸዋ መኳንንት

እጄ የታሰረው በወርቅ ሰንሰለት

ከራሴ ላይ ዘውዱም ቢወሰድ በጉልበት

አልተንበረከኩም ለሚኒልክ መንግሥት

እኔም አንተም ንጉሥ ማንበላለጥ

ግብር አልገብርም እጄንም አልሰጥ

ብሎ የመለሰ በኩራት በድፍረት

ጋኪ ሻረቾ ነው የካፋ ህዝብ አባት

አልበገር ያለ ለሚኒልክ ጦር

አልበገርም ያለ የቆመ ለሀገር

ከሻረቾ በቀር ሌላ ማን ነበር

ጦርነት የፈሩ የሸዋ መኳንንት

ተልከው ነበር ጋኪን ለማግባባት

የጋኪ ሻረቾን የዚያን የካፋ ጀግና

እነ ሀብተጊዮርጊስ ተጠርተው ይምጡና

ለምስክርነት ቤርቤር ይጠራና

ያውሩ ጀግንነቱን ዛሬም እንደገና

አሳልፎ ያልሰጠ የካፋን ምድር

ይኸ ታላቅ ንጉስ ይገባዋል ክብር

አፈር ቢጫነኝም ብገባ መቃብር

ዛሬም ዘብ ቆሜአለሁ ለሀገሬ ክብር

ለብዙ ዓመታት በእስር ቆይቼ

አንገቴን ሳልደፋ ጠላቴን መክቼ

የጀግንነት ዓርማ ለትውልድ ትቼ

የሀገሬ ወጣት ታዲያ ምን ነክቶህ ነው

ድካሜን ለፋቴን ከንቱ ያደረከው

ይህን ሁሉ በደል ቆመህ የምታየው

አንተ የካፋ ወጣት ዛሬ ምን ነክቶህ ነው

ሀብትህን ሲዘርፉ በቃ የማትለው

የሀብት ማነስ ነው ወይስ የእውቀት

ምንድነው መንስኤው የአንተ ድህነት?

ፋንታዬ መኮ

Leave a comment

ከደቡብ ምዕራብ ኢትዮጵያ ሕዝብ ህብረት እና ከጋምቤላ ሕዝቦች ዴሞክራሲያዊ ግንባር የቀረበ ጥሪ


ከደቡብ ምዕራብ ኢትዮጵያ ሕዝብ ህብረት እና ከጋምቤላ ሕዝቦች ዴሞክራሲያዊ ግንባር የቀረበ ጥሪ

የተከበራቹ የኢትዮጵያ ህዝቦች፣ በሃገራችን ላይ እየደረሠ ያለውን ጭቆናና የግፍ አገዛዝ በመቃወም በሃገር ውስጥና በውጭ ሃገር በመደራጀት በትግል ላይ የምትገኙ የፖለቲካ ፓርቲዎች በሙሉ። ለ26 ዓመታት በወያኔ መንግስት የግፍና የጭቆና ቀንበር አገዛዝ ሥር በመውደቅ ለበርካታ የሰብአዊና የዴሞክራሲያዊ መብት ጥሰቶች የተጋለጠው የኢትዮጵያ ህዝብ ተቃውሞውንና እንቢተኝነቱን በሃገሪቱ አራቱም አቅጣጫዎች ማሰማት ከጀመረ ዓመታት አስቆጥሯል።  በመሆኑም የወያኔ መንግስት እየተከተለ ያለው የዘረኝነት ፖለቲካ በአንድነቷ ፀንታ የቆየችውን ኢትዮጵያን በመበታተን ህዝቡን እርስ በእርስ እንዲጋጭና ሃገሪቱ ወደ ከፋ ቀውስ እያመራች በመሆኑ ምሬትና ብሶት ያንገሸገሸው የኢትዮጵያ ህዝብ የቁርጥ ቀን ልጆቹ ገሚሱ ለእስር እና ለስደት በሺዎች የሚቆጠሩ ደግሞ ለነገይቱ ኢትዮጵያ ነጻነት ውድ ህይወታቸውን በመገበር ልይ እንደሚገኙ ይታወቃል። የተከበራቹ የኢትዮጵያ ህዝቦች ከቀን ወደቀን እየበረታ የመጣውን የህዝብ ተቃውሞ ለመቀልበስና የግፍና የጭቆና አገዛዙን እድሜ ለማራዘም ወያኔ በተለያዩ ወቅቶች የማዘናጊያና የማደናገሪያ ሥልቶች ሲጠቀም እንደነበር የማይካድ ሃቅ ነው።

ስለሆነም በቅርቡ በጭንቀትና በውጥረት የተሞላው የወያኔ ኢህአደግ የ17ቀናት ስብሰባ መጠናቀቁን ተከትሎ የፖለቲካና አንድአንድ የታሰሩ ግለሰቦችን እፈታለሁ ብሎ የተምታታና እርስ በእርሱ የሚጣረዝ መግለጫ መስጠቱ ይታወሳል። እንደሚታወቀው ቁጥራቸው በውል ያልታወቁ ነገር ግን በሺዎች የሚቆጠሩ ታጋዮች የመሰደዳቸው ፣የመታሰራቸውና የመሰዋታቸው ዋነኛ ሚስጢር በቁም እና በህሊና እስረኝነት የሚሰቃዩ የኢትዮጵያ ህዝብን ነፃ ለማውጣት እንደነበር ወያኔዎችም የሚጠፋቸው እውነታ አይመስለንም። ሆኖም የወያኔ መንግስት ከተደቀነበት ውጥረትና ከተጋረጠበት የገነፈለ የህዝብ ሥሜት ለመሸሽና ውንብድናውን አጠናክሮ ለመቀጠል የዘየደውን ከንቱ ዘዴ መላው የሃገራችን ህዝብ በጥንቃቄ እንዲመለከተውና እንደሚያጤነው እንገነዘባለን። በገዛ ሃገሩ እንደ ሁለተኛ ዜጋ በመቆጠር ሠብዓዊና ዴሞክራሲያዊ የመብት ረገጣ የተዳረገውና ላለፋት 26 ዓመታት በጉስቁልና ህይወቱን እየገፋ የሚገኘው ጀግናው የኢትዮጱያ ህዝብ በወያኔ የማደናገርያና የማዘናጊያ ታክቲክ ሳይታለል ትግሉን ከመቸውም ጊዜ በበለጠ አጠናክሮ ሊቀጥል እንደምገባው በአፅንኦት እንገልፃለን። ከራሳቸው ክብርና ርካሽ ጥቅም ይልቅ ለህዝባቸው ነፃነት መከበር አምርረው በመታገል ላይ የሚገኙ ብርቅዬ የገዥው ፓርቲ አባላትና አመራሮች በጀመሩት ያላሰለሰ ትግል የመላውን ህዝብ የልብ ትርታ በማዳመጥ ለላቀ ድል ወደ ፊት መገስገስ እንደሚገባቸው ለመጠቆም እንወዳለን።

በቡድንና በፖለቲካ ድርጅት በመታቀፍ በሃገር ውስጥና በውጭ ሃገራት የኢትዮጵያን ህዝብ ከወያኔ የግፍ አገዛዝ ነፃ ለማውጣት በመታገል ላይ የምትገኙ ሁሉ ምንም እንኳን በአደረጃጀት ባህሪ በተለያየ መንገድ ብንደራጅም የመዳረሻ ግባችን አንድ ነውና ከመቸውም ጊዜ በበለጠ ሁኔታ በውስጣችን ያለውን ልዩነት በማጥበብ ተቀራርበን በኢትዮጵያ ሠላማዊ የሥልጣን ሽግግር ተግባራዊ እንዲሆን የበኩላችንን እንድንወጣ ጥሪያችንን እናቀርባለን።

የወያኔ መንግስትም ቢሆን በመላ አገሪቱ የሚገኙ የህሊና ታሳሪ የሆኑ የፖለቲካ፣የሲቪክ ማህበራት መሪዎችንና ጋዜጠኞችን በሙሉ ያለምንም ቅድመ ሁኔታ በመፍታትና ተገቢውን ካሳ በመክፈል  ሥልጣኑን ሠላማዊ በሆነ መንገድ ለባለቤቱ ለተከበረው ህዝብ እንዲያስረክብ እንጠይቃለን።

በመጨረሻም የፖሊስ እና የተከበራቹ የመከላከያ ሠራዊት አባላትም እየተረገጠ እና እየተጨቆነ ያለው የወገናችሁ ብሶትና በደል ተሰምቶአችሁ እስከዛሬ ለግድያና ለድብደባ የወሰዳችሁትን የመሣሪያ አፈሙዝ ወደ ላይ በማንሣት ለህዝብ ነፃነት እየታገሉ ካሉ የቁርጥ ቀን ልጆች ጎን በመቆም በወርቅ መዝገብ ላይ የማያልፍ ታሪክ እንድታስመዘግቡ በአክብሮት ጥሪያችንን እናቀርባለን።

ድል ለመላው የኢትዮጵያ ሕዝብ!!!

ለዘመናት ፀንቶ የቆየው የኢትዮጵያ ሕዝብ አንድነት ዛሬም ሆነ ለወደፊት እንደተጠበቀ ይኖራል!!!

http://kaffamedia.com

Posted by: Kumilachew Gebremeskel Ambo